Chanerika Hellement i Bianty Gomperts ta konta di demensia/Alzheimer
E programa di awe ta bai toka un tema un tiki difísil pa papia di dje: demensia. E ta un tema difísil, pero ta importante pa papia i informá otro di e malesa. Di e manera aki, bo ta konsientisá, i yuda personanan den e situashon aki pa aseptá e malesa, pa asina nan por tene na kuenta loke nan mester hasi. Pa elaborá mas riba e tema aki, a entrevista Sra. Chanerika Hellement, presidente di Stichting Alzheimer, i tambe nos promé finalista di Miss Kòrsou 2023, Bianty Gomperts, ku ta abogado di e fundashon. Tur oportunidat ku e risibí, e ta usa su bos pa yuda konsientisá pueblo di Kòrsou riba e malesa di demensia, dor di konta su mes eksperensia.
Meta di Stichting Alzheimer?
E malesa di demensia no ta algu fásil. Chanerika ta splika ku ora bo tende ku un ser kerí ta sufri di e malesa aki, e promé pensamentu ta, “Kon mi ta bai trata e persona aki?”. I esaki ta loke Stichting Alzheimer ta para p’e. E fundashon ta pa duna sosten na personanan ku a keda diagnostiká ku e malesa di demensia, i tambe e famia òf ser kerí ku ta kuida e persona diagnostiká. Chanerika ta suprayá ku hopi bia ora e persona keda diagnostiká, nos tin e tendensia di sera e persona den un kamber, i nos no ta kòrda mas riba dje. Akinan, e fundashon ke hasi un diferensia. Di forma di organisá diferente aktividatnan manera di músika, baile, weganan di ántes, e fundashon ke rebibá e añanan anterior di e persona aki. Un dia kompletu, e personanan aki ta bin pasa na fundashon, kaminda nan ta konektá ku otro i kombersá. Chanerika ta kontinuá ku e fundashon ta wak unda por sostené e famia. Pa medio di un konsulta, e fundashon ta guia e famia komo dòktor, enfermera, sikiatra, pastor òf djis un amiga.
E fundashon ta ofresé diferente charla organisá pa e fundashon mes, òf otro organisashonnan ku ta aserka e fundashon. Ademas, tin Hòfi Alzheimer, di kual tur bia un típiko riba e tema demensia ta bini dilanti. Por ehèmpel, tin sekshon di abogado, ku ta un parti importante ku lo bai hunga un ròl mas den futuro di e trayekto. Ta bon pa ta prepará riba tur área rondó di e malesa. Asina tin aktividatnan sosial i tambe hubenil, kaminda hóbennan ta duna sosten na otro hóbennan ku tin un miembro di famia ku a kuminsá lubidá. E ta mas fásil ora un hóben ta konektá ku un otro hóben den su preokupashon òf doló.
25 aña di eksistensia
Promé di mart 2025, e fundashon ta kumpli 25 aña di eksistensia kaminda nan ta duna e servisio di sosten na personanan ku ta diagnostiká ku e malesa òf e famia. E fundashon ta afiliá na Alzheimer Disease International, pues, Kòrsou ta forma parti di e 105 pais ku ta duna sosten di Alzheimer, Chanerika ta bisa ku orguyo. Mundialmente, kada 3 sekònde un persona ta wòrdu diagnostiká ku e malesa. Di aña 2018 bini ariba tin entre 250 pa 300 famia nobo ku ta bishita e fundashon. Ántes, e tabata un malesa di hende grandi, pero awendia bo por mira ku esaki a kambia, i edat nan ta keda bira mas hóben. Chanerika ta kompartí ku e edat di mas yòn ku e fundashon a yega di diagnostiká ta 35 aña.
Kiko ta kondusí na e malesa aki na un edat yòn
Chanerika ta bisa ku loke e fundashon a opservá ta ku hendenan mas hóben no ta kuida nan kurpa manera debe ser. E promé pregunta ku Chanerika ta puntra ora e risibí un persona ku a keda diagnostiká na un edat hóben ta: “Kon e hende aki su manera di bida tabata?” Hopi biaha, famia ta kontesta ku e persona tabata traha henter dia i ta’tei pa tur hende ménos nan mes. Faktornan ku por kontribuí na demensia na un edat hóben ta strès i trabou eksesivo. Nos ta biba un bida hopi hansha i lubidá di traha tempu pa nos mes. “Kua dia abo ta dediká kompletamente na bo mes?” Ora bo mente ta keda drai 24 ora pa dia i 7 biaha pa siman, esaki ta kontribuí tiki tiki ku bo ta kuminsá lubidá. Manera di kome. E sistema di kome ta esensial. Purba kome salu i ekilibrá pa duna bo selebre e nutrishon ku e mester. Deskanso i lusnan artifisial. Purba drumi 7 pa 8 ora nochi i evitá lus den kamber i e telefòn serka di bo kabes ora bo ta drumi. Falta di moveshon. Moveshon ta un otro punto importante. Ehersisio regularmente ta yuda bo mente i kurpa. Bo selebre ta wòrdu afektá si bo tin problema ku oido i bista i no tuma medidanan korekto. Personanan ku diabétis i preshon haltu ku no ta sigui e rekomendashonnan di dòkter ta na un riesgo mas haltu. E fundashon ta keda informá i laga hende sa ku mester tene e puntonan aki na kuenta.
E mesun puntonan ku ta kondusí e malesa, ta e puntonan ku si bo tene na kuenta, por yuda prevení ku e fase unu di e malesa ta sigui desaroyá, Chanerika ta bisa.
Kiko pa prevení e fase unu di demensia
Purba kome bèrdura i fruta bèrdè. Si bo no ke kome esakinan, bo por traha batido di bèrdura i fruta. Ora bo ta bai kome algu dushi, purba di kome kos dushi natural manera almendra i nechi. Hasi moveshon mínimo 5 biaha pa siman. Purba kana, esaki ta yuda trankilisá bo kurpa i bo mente. Kuida e ambiente rondó di bo. Habri bentana di bo kamber mínimo 3 biaha pa siman. Hopi biaha nos ta sende bela den kamber ku bentana será, konsekuensia di esaki ta afektá bo selebre. Evita bebe i huma. E abuso di alkohòl ta hopi bou di hóbennan. Na e momentu nan aki nan no ta konsiente ki konsekuensia e lo por tin riba nan selebre despues di 20 aña. Na e fundashon nos ta mira ku famia ta bai kana ku e persona ku tin e malesa, i bo por mira kon trankil e personanan aki ta bira, tambe nan ta mas alegre. Esaki ta importante pa e persona diagnostiká, pero tambe pa esun ku ta kuida e persona.
Aserka e fundashon
Chanerika ta bisa ku e famianan mes ta aserká e fundashon. Tin biaha dòkter òf sikiatra ta duna nan un karta pa nan por bini na e fundashon, pero esaki no ta nesesario. Loke ta nesesario ta traha un sita, paso tur siman e fundashon ta yen. Di asina aki, nos por konsentrá mihó riba e persona, dor di tene un kombersashon. Naturalmente, pa e famia, esaki no ta fásil, Chanerika ta splika. Un kos riparabel ta ku tin hopi problema den famia. Loke e semper e ta bisa ta: “Ban laga tur e problema nan aki un banda, paso ta 1 mayor bo tin i ban yuda e mas mihó posibel.” Tin momentu bo ta haña bo ku 1 yu so, i otronan kaminda tin 10 ruman. Asina e ta kuminsá ku un yu ke hiba e mayor kas di kuido, e otro ke kuida e na kas, òf un yu ke tuma tur e trabou i e otro no ke tin nada di aber ku situashon. I e parti di aseptá ta kaminda lágrima ta bini den e wega. Ta un momentu hopi emoshonal, pero ku mester keda enfrentá. Al kontrario di e otro malesanan, na e malesa aki bo kurpa ta keda intakto, pero bo mente ta bai atras. E persona ta sigui hasi tur kos, ménos kòrda bo ku ta su ser kerí, Chanerika ta klousura.
E historia di Bianty
Bianty ta un hóben ku su mama a keda diagnostiká ku e malesa di demensia na un edat basta yòn. Dor di su eksperensia, e ta kompartí esaki pa yudá otro hóbennan aseptá e malesa aki i konsientisá e pueblo di Kòrsou
Bianty ta konta ku su mama tin 5 aña ku e malesa aki. E ta enfatisá e palabranan di Chanerika, ku e malesa ta drenta manera un vruminga, òf mihó bisa, manera huma. Bo no ta mira e, pero bo ta sinti e, i ora bo mira e, ta lat kaba. Ora bo kuminsá sinti síntoma di e malesa, bo ta buska tur tipo di solushon pa e problema, ménos aseptá ku ta e malesa di demensia. Bo ta bisa: “Ta kansansio, porta mi ta traha muchu duru, òf ta strès.” Pero unabes bo tende ku e persona a keda diagnostiká ku demensia, bo sa ku no tin kura pa e. Bianty ta bai mas profundo den su eksperensia personal, i e ta bisa ku e promé 2 añanan ku su mama a keda diagnostiká ku e malesa, tabata hopi difísil pa e rekonosé i aseptá esaki. “Mi mama ta mi héroe, mi tur kos…di ki manera e ta bira malu?” Esaki tabata su palabranan di doló. E ta sigui kontá ku el a bai dòkter ku su mama i tambe Stichting Alzheimer. “Promé, mi tabata purba skonde e situashon pa hende no sa ku mi mama tabata malu. Mi tabata skonde e, tantu pa mi mama pero tambe pa mi mes imágen. Dor di purba tené e un sekreto, mi mes a kuminsá bai atras mentalmente. Mi no tabata kuida mi mes. Esei a buta ku mi tabata yora hopi, i mi no kier a aseptá yudansa di niun hende,” Bianty ta kontá su doló. Mirando e situashon ku Bianty tabata aden, su ser kerí nan a bisa e ku ta dimas loke e ta hasi. Si e no ke risibí yudansa di su ser kerí nan, sikiera buska informashon òf un organisashon ku por yudá e. Asina, Bianty a yega na porta di Stichting Alzheimer. Nan a yudá i guiá e asina bon ku el a disidí di forma parti di e fundashon, kaminda e ta ‘advoká’ i yudá otronan den mesun situashon.
Ta bon pa menshoná ku Bianty ta un di e poko hendenan den su generashon ku ta papiá habri di loke el a pasa aden, tantu e parti bunita komo e parti ménos bunita. Ku doló na su kurason, e ta konta su historia, paso e ta na haltura ku su eksperensia por yuda otronan ku ta den mesun boto ku ne. Manera a menshoná anteriormente, e edat di hendenan ku ta enfrentá e reto di kuida nan mayor ta bira kada bes mas yòn. Pa promé bia lo tin hopi hóben mas ku lo enfrentá e reto di kuida nan mayor. Bianty ke yudá i guiá nan, pa nan no pasa den e mesun situashon di no aseptá i skonde e malesa. Dor di papiá i buska yudansa, e trayektoria ta bai mas fásil. Bianty ta menshoná ku tin un mayor ku e malesa aki no ta un bèrgwensa. Na promé instante, e no tabata sa nada di demensia, pasobra den nos komunidat e ta un tabú ku bo mayor ta bai atras i abo mester kuida e. Pero dor di informá su mes, Bianty ta spliká ku el a bin aseptá, i esaki tabata un momentu bunita ku a hasi e mas fuerte. Ademas, e relashon di e ku su mama a bira mas mihó, pasobra e tabata sa kiko e lo por spera.
Genétiko
Den kaso di su mama, Bianty a averiguá ku ta algu genétiko. Pero banda di esaki, su mama tabata un persona ku hopi strès.E tabata yuda tur hende, i semper e tabata buta su mes lastu. Tur hende su problema, e tabata hasi di dje. Segun Bianty, esaki a kondusí ku su mama su salú a bai hopi mas lihé ku normal. Aunke e malesa ta genétiko, Bianty ta indiká ku e no tin miedu ku e lo por haña e malesa. E miedu di mas grandi ku e tabata tin, tabata di pèrdè su mama. Na e momentu aki, e ta enfrentando su miedu ku kara na laira, paso e sa ku su mama a hasi un bon trabou dor di duna e tur e abilidatnan ku e lo por sigui biba, maske ku su mama no lo tei mas na bida. E ta menshoná ku si e yega na e punto ei, el a sa di biba un bida dushi i laga memoria bunita atras, ku su ser kerí nan por kòrda i disfrutá di dje. Na ingles, nan ta bisa: “To make my mark in this world.”
E Amor di un Mama
“E amor di un mama ta algu ku lo keda semper,” Bianty a bisa. “E no ta algu ku ta kita fásil.” Den e promé etapanan, su mama tabata konsiente di kiko e ta pasa aden i kiko lo bai sosodé. Apesar di tur kos, su mama semper a trata Bianty ku rèspèt. Bianty ta mira su mama ku mesun wowo, i e tin hopi rèspèt pa su mama, paso e sa ku e situashon no ta fásil. Un poesia ku e ta konektá bon kuné titulá: ‘Mi stima esun ku a kuida mi, i ku awor ami ta kuida.’ “E tabata e mihó mama i el a duna mi tur loke mi tin mester di dje pa por sigui biba sin dje” . Bianty ta enfatisá ku e doló aki ta úniko, i e no lo ke deseá e ni riba su pió enemigu. “Bo ta mira bo mama den su wowo, i e no ta rekonosé bo.” Komo un hóben ku ta kuida i konsientisá otro hende, Bianty ta buska kada oportunidat pa papia riba e tema. E ta konta ku hopi biaha ora e hasi entrevista, e ta risibí mensahenan manera: “Mi a wak bo entrevista, danki pa duna nos un bos, paso ami no tin e forsa ei ainda.”
Memoria di mas bunita
E memoria mas bunita ku Bianty ta kòrda di su mama ta e djadumingunan. “Djadumingu, ni ami ni mi mama no tabata plania ku otro hende. Esei tabata nos dia. Nos tabata bai movies, wak 3 pelíkula, òf bai kome.” Bianty ta reflehá ku su mama tabata stima di ta un mama. E amor ku e tabata duna tabata asina bunita, i ta biba komo memoria den su kabes. Awor ku Bianty mes ta kuida su mama, e ta menshoná ku e memoria dushi ta ora nan ta baila den balkon. Su mama stima muzik, sigur su tumbanan. “Ta bon pa dokumentá tur e memoria aki, paso esaki ta bo tesoronan,” Bianty ta terminá.
Simposio den Mart
Kada 5 aña, Stichting Alzheimer ta organisá un kongreso. E aña aki, den kombinashon ku e selebrashon di 25 aña, e fundashon ke duna un mihó enseñansa na pueblo di Kòrsou. E simposio ta bai tin diferente oradó, tantu lokal komo internashonal, ku oradornan for di Boneiru, Hulanda i Dominika. E tema ta: “E sosten despues di wòrdu diagnostiká”. Fecha ta 7, 8 i 9 di mart. Lokashon lo keda spesifiká. E kongreso lo ta un evento sigur kargá ku informashon, kaminda e promé dia lo tin oradónan di Alzheimer Disease International i Alzheimer Nederland. Djasabra lo tin informashon riba tur e sosten ku e fundashon ta ofresé na famianan. Bianty lo bai profundisá den su eksperensia. Ademas, un persona ku e malesa lo konta su eksperensia personal. Temanan spesial ta músika i e impakto ku e tin riba bo mente. Un hóben di 24 aña ta bini for di Dominika pa konta kon el a kuida su wela for di un edat di 17 aña, i kon el a habrí su mes asosiashon pa guia otro hóbennan. Un otro hóben di 24 aña, ku na 20 aña, el a disidí ku e ta bai biba un periodo na un kas di kuido, pa eksperensia di serka kon ta biba ku e malesa. Asina lo tin diferente seshonnan pa iluminá, eduká i duna mas klaridat riba e malesa i su impakto.
Stichting Alzheimer ta invitá pueblo di Kòrsou pa bin informá i elevá nan mes riba e malesa di demensia, ku ta di suma importansia. Manera a menshoná anteriormente, kada 3 sekònde un persona mundialmente ta keda diagnostiká ku e malesa aki.
Pa inskribí, por manda un mail na alzheimercuracao@gmail.com, tuma kontakto via 462-3900, òf manda un app na 510-9138. Tambe, por pasa libremente na e kantor di e fundashon djaluna, djárason i djabièrnè entre 9’or i 12’or. E kosto pa e simposio ta Fl.150, teniendo na kuenta ku e fundashon no ta wòrdu supsidiá. Tur e gastu nan di sertifikado, oradornan i konsumo ta di donashon ku e fundashon a risibí.
