Anthony Haile ta Governor di distrito di Canada i Caribe. Tur e partinan ei e tin awor komo Governor e responsabilidat. E distrito ei ta parti di e totalidat di e otronan. Kiwanis Club Kòrsou awor aki tin 56 aña di eksistensia miéntras e mes tin 36 aña den Kiwanis. Den e kantidat di añanan ei den Kiwanis, Anthony a okupá praktikamente tur fushon di Kiwanis ku eksepshon di esun di tesorero.
Kiwanis Kòrsou ta pertenesé na un divishon, kaminda nan ta parti di un kantidat di Kiwanis den Caribe ku ta den un divishon i aki ta na divishon 26. Divishon 26 tin un lt governor na kabes i e funshon ei tambe Haile a funshoná. Banda di e lt Governor un persona por bisa District Trustee. Ku esaki Haile a splika ku Kòrsou ta pertenesé na e divishon di Eastern Canada i Caribe i nan a repartí e diferente Kiwanisnan den region i aki ta na e region I ku ta konsistí dos divishon i einan tambe Haile tabata e district Trustee. Esaki ta nifiká ku n parti di e board di Kiwanis ku ta tuma divishon. E tabata forma parti di e direktiva ku tabata tuma desishon, reuniendo un bia pa luna. Mas aleu segun Haile a konta Djasabra, e por a bira Vise Governor i esei ta nifiká ku e siguiente aña outomátikamente bo ta bira Governor Elihi i despues bo ta bira Governor i einan Haile ta awor aki. E ta e persona mas importante awor aki den su distrito di Eastern Canada i Caribe. E tin di duna OK pa desishonnan ku tin di keda tuma.
Komo Governor di distrito di Kiwanis ta masha hopi hende ta aserka i e tin di skucha tur. I hopi hende ta bis’e kiko e tin di hasi. E ta skucha tur i despues tuma desishon.
Representá bo pais
Segun nos a papia ku Haile nos a komprondé kuantu atenshon e ta haña ora e yega di bishita na paisnan den eksterior. Na Kòrsou nos ta wak e funshon ei komo algu simpel pero den eksterior ta otro kos. Haile a bisa ku e tabata esei i awor e ta eksperensi’é. Ora bo ta Governor bo ta representá no solamente Kiwanis pero bo pais tambe. I e na su turno tin di splika ta unda Kòrsou ta pasobra tin hopi hende ku ainda no sa esei. E ta kòrda ku for di 1e di òktober 2022 e ta Governor. I komo Governor e tin kantidat di divishon ku e tin di bishita, for di Nort Canada te Karibe. El a hasi 2 bishita kaba, Newfoundland ku ta hopi friu i danki dios tabata fin di novèmber ku e friu tabata poko aseptabel, Einan nan a risibié ku man habri pasobra ta Governor a yega. E ta bishita e diferente klupnan i e ta duna konseho. Haile ta kòrda ku na Newfoundland nan tabatin un problema kaminda nan no tabatin un persona pa sigui e LG. El a sinta kombersá ku tur e klupnan i ora el a yega Kòrsou el a logra i esei ta danki na su kontaktonan. El a yuda resolvé e problemanan. Na desèmber el a bai Bahamas i einan ta manera presidente a yega. El a haña asta eskolta di polis i mester a bishita e mandatarionan di mas haltu manera Governor di Bahamas, promé minister di Bahamas i serka nan tur e tin di kombersá i einan ta masha bunita pa ofresé un regalo. Ta kara su pais e ta representá i e tin di bai ku algu di Kòrsou. Hopi bia e mes ta finansiá e parti ei. Serka e gobernadó di Bahamas el a regal’é algu pa pone riba mesa di Kòrsou. Ku esaki Haile a pone atenshon ku kisas e ta bini si di un organisashon pero ora e biaha no ta e organisashon ei so e ta presentá pero tambe su isla. Haile ta masha gradesido na Ofisina di Turismo pasobra di el a keda eligí aña pasá, el a aserká sr. Clarinda pa algun opsekio pa promové Kòrsou. I el a haña algun ‘Name Tag’ pa maleta masha bunita. Na e okashon ei el a pasa un video pa mustra unda Kòrsou ta keda. E video ei segun Haile a hasi un impakto inmenso. Próksimamente e tin di ba Jamaica i e nos a ku e por bolbe aserka ofisina di turismo pa por yuda ku material pa promové Kòrsou. E ta spera di tòg por konta ku nan pasobra ta un ‘eksposure’ pa Kòrsou ku t algu impagabel. Haile a bisa ku e no ta pidi sèn pero material pa eksponé Kòrsou kuné. Haile tambe ta haña e pregunta di ki dia por organisá un konvenshon di Kiwanis na Kòrsou. E ta spera ku un dia por logr’é i ku lo haña e yudansa nesesario pa e bira realidat pasobra un biaha mas ta representantenan di rònt mundu lo ta aki. E ta spera e instansianan ku e ta bati na nan porta lo por kue su telefòn i saka un man pa yuda, ku por sierto no ta sèn pero ta material.
Mas miembro
Na Kòrsou mes Kiwanis tin dos klup ku ta Kiwanis Ckub Kòrsou i Kiwanis Piscadera i awor tin e young profesionals ku ta dunando forma. Nan di Kiwanis Kòrsou i Piscadera ta e bieunan i e ‘young professionals’ ta hóbennan ku otro forma di traha. Kiwanis ta para pa servisio i den esei e mucha ta importante. I den e klupnan na Kòrsou e mucha ta importante pero tur aktividat pa mucha nan ta dispuesto pa yuda. I p’esei si nan por haña mas hende pa yuda lo ta bon. Kiwanis Club Kòrsou den pasado tabatin mas di 40 miembro pero awor aki ta 27 hende. Awor aki nan por hasi uso di mas hende ku ta dispuesto na duna man na komunidat. Un di e aktividatnan ku Haile a bisa ku semper el a hasi ku masha plaser ta esun den temporada di Pasku. Nan tabata traha paketenan i nan mes tabata drenta bus ku asta papa Pasku i ku músika ta bai na kas di e persona pa entregá e paketenan. E reakshon ku semper nan a haña ta ku e makutu ta importante pero loke mas e hende a gusta ta e echo ku a kòrda riba nan i duna nan felisidat. Dor di covid 2 aña largu nan aktividatnan di rekoudá fondo a baha drástikamente. Un di nan tabata e rifa di outo kaminda por gana 3 outo.
Rekisito pa ta miembro
Loke nan ta hasiendo pa por atraé hende nobo den e klupnan segun Haile ta promoshon manera e entrevista di Djasabra. I esnan interesá por yama a 5126220. I ora yama por haña splikashon di e rekisitonan pa por forma parti di Kiwanis pasobra e tin di ‘Lusten en Lasten’. Un di e ‘lusten’ ta ku mester paga kontribushon pasobra e aktividatnan di rekoudá fondo tur ta bai bèk den komunidat. Entre otro nan ta yuda Special Olimpics, tambe tin e Key club. I un di e eksigensianan pa drenta e klup ta ku e hende mester tin e boluntat pa hasi sakrifisio, pa kooperá den rekoudashonnan di fondo i paga e kontribushon chikí pa luna pa e partinan ku nan mes ta usa.
Benefisio
I e benefishinan pa forma parti di un organisashon manera Kiwanis ta ku bo ta traha kontaktonan. I den bida kontaktonan ta masha importante i esaki ta tres e mas chèns pa logra hopi. I den e kontaktonan tambe tin esnan internashonal pasobra tur aña tin konvenshonnan internashonal. Den e konvenshonnan aki bo ta konosé hopi hende i sera amistat i kontakto di e forma aki. I pa ta Governor ta un eksperensia úniko asina Haile a terminá.
