Tamara Nivillac
Dia 2 di yüli awor, riba dia di Himno i Bandera nos lo tin 10 hóben ku lo mustra nan talento riba Brionplein. E hóbennan aki ta forma parti di e proyekto Mi Talento Mi Pais;Youth Voices 2026. Komo lider di proyekto nos tin Tamara Nivillac kende ku hopi entusiasmo a konta nos di e preparashonnan pa por kana yega 2 di yüli.
Proyekto piloto
Tamara a konta Djasabra ku e ta sumamente entusiasmá. El a mira e kos akí komo un beibi pasobra e tin di aber ku kanto i músika ku e ta pashoná kuné. Mi Talento pa Mi Pais Youth Voices ta un proyekto ku ta eksistí kaba ku ministerio di enseñansa siensia kultura i deporte ta hasi kaba pero den otro formato. Promé e tabata mas bien un kompetensia di kanto, baile i poesia i habri pa tur hende partisipá na dje. E aña aki ta diferente. Ta bai purba algu otro, ta un proyekto piloto pa mira kon e ta bai impakto. A pensa pa enfoká riba formashon. Hopi bia ora hasi un kompetensia, e ta manera algu di e momentu ei kaminda e hóben ta bini, e ta hasi su presentashon, sea e ta gana òf nò i no ta tende mas di dje. I p’esei e aña aki ta bai purba algu nobo, kaminda ta ofresé mas na e hóben, mas formashon, mas tempu di guia i asina nan ta haña un tiki mas enseñansa i formashon real. Esei ta e kambio chikí e aña aki. Lo traha ku hóbennan di 12 pa 25 aña.
Saka loke e hóben tin paden
E aña aki Talento pa mi pais yama Youth Voices pasobra ta enfoká mas riba kanto. Pero tambe ke tende kiko ta biba den e hóben. E ‘voice’ ta e bos i kiko ta biba den e hóben. I esei ke traha riba dje i saka afó. Hopi bia e hóben ta mustra ketu, pero e tin aden. I p’esei ke traha ku e hóben riba ekspreshon i kreatividat i saka loke tin den nan i krea algu nobo huntu. Lo bai tin un oudishon pa duna oportunidat na tur hóben ku tin e talento di kanto. Dia 9 di mei ta e oudishon i eiden lo tin un kuerpo di hurado pa selektá un grupito chikí di mas òf ménos 10 hóben pa traha ku nan den e ‘Talent lab’.
Dos luna di formashon intensivo
Den e ‘Talent lab’ akí e kos ta bai brui, esei ta e forma, e laboratorio. Lo duna e hóbennan guia riba ‘song writing’. Lo tin un ‘coach’ pa saka for di nan nan sentimentu i mas ainda nan sentimentu pa ku Kòrsou, kiko nan ta sinti pa ku nan bandera, nan kultura. Nan lo partisipá den un ‘Writers Camp’, esta drenta den un studio bou di guia di un kanta outor i lo traha un kansion huntu. Esei lo bira algu intensivo pero interesante i great pa nan eksperensiá. I ora sali for di einan lo haña e guia vokal. Kon e vokal ta sinta den otro, kon e kuèrdè ta traha i kon pa us’é. I despues lo haña ‘performance coaching’ pa nan siña presentá ku ta un parti importante. E hóben lo haña guia ora e para riba esenario kiko e ke transmití pa e públiko pa nan komprendé mihó e mensahe. Tur esei ta den e ‘Talent Lab’ pa kulminá dia 2 di yüli riba Brionplein.
E balor agregá
Mi Talento pa Mi Pais di e aña aki ta un proyekto piloto. Ta promé bes ku e ta tuma lugá di e forma aki i p’esei Tamara Nivillac ta pidi tur hende pa duna nan benefisio di duda, duna nan espasio pa nan por demostrá pasobra tur kos nobo por tin su krekechénan. Nan ta super eksitante i a hinka e kosnan den otro i ta spera ku e hóbennan lo haña balor agregá den e dos lunanan ku ta bini aki i ku ta balor i vishon a hasié. Di e forma aki lo forma e hóben i pa dia 2 di yüli mira algu bunita.
Presentashon final 2 di yüli
Pa loke ta e kansionnan Tamara a splika ku komo e presentashon final ta dia 2 dia di himno i bandera a enfoká riba Kòrsou. Ke traha ku e hóbennan riba Kòrsou kiko nan ta sinti, nan vishon pa nan pais, nan stima nan idioma etc etc. Hopi bia no tin kansionnan di hóbennan riba Kòrsou pero mas hende grandi. Pero e hóben tin di bisa riba dje pasobra nan ta sinti pa nan pais. Ke treger e hóben pa nan traha kansion riba nan pais. Algu ku tin di aber ku patriotismo ku ta traha riba dje serka e hóbennan.
Kòrsou ta pata pata di talento
For di momentu ku el a anunsiá e proyekto aki e reakshonnan ta inmenso. Tamara a splika ku nan ta bayendo skolnan i a ‘pop op’ algun skol, konektá ku e hóbennan pa sa ken ta kanta i nan ta mustra riba otro i ta bai serka nan pa nan kanta. Kòrsou tin hopi talento den tur área segun Tamara. Kòrsou ta pata pata di talento. E biahanan ku a konektá ku hóbennan na skolnan el a keda impreshoná. Hopi kara nobo, karanan skondí. Meskos ku den iglesianan tambe tin i ku nan no tin kurashi di partisipá na proyektonan. Tin hopi talento i Tamara ta haña bunita ku netamente pa e hóben ku no tin kurashi pa partisipá na proyektonan, esun aki ta sumamente positivo pa nan. i lo enfoká riba Kòrsou pa asina dia 2 di yüli presentá algu bunita pa Kòrsou.
Duna e hóben libertat pa krea
Ta interesante pa sa kiko e hóben lo presentá i Djasabra a pensa asta den rep. Tamara a bisa ku nan a hür profeshonalnan pa kada parti pero su vishon no ta solamente kanto pero tambe Spoken Word, esta rep riba muzik, laga e hendenan para ketu un ratu di nan pensamentu i sentimentunan. E hóbennan lo bai hasi nos hopi orguyoso, asina Tamara a indiká. Loke e ta haña masha bunita ta ku ta bai kue 10 hóben ku no konosé otro for di diferente parti i no den grupo huntu i lo trese nan huntu i forma algu. E ta un konekshon di hóben pa hóben i duna nan libertat pa nan krea. Lo tin e guia pa guia pero nan tin e libertat. I si ta regi nan ke esei pro, si ta rep lo por i duna e hóben chèns pa krea loke e ke.
Traha ku hóben ta dushi
Esaki no ta promé bes ku Tamara Nivillac ta traha ku hóbennan. El a bisa Djasabra ku tempu e tabata biba na Kòrsou i tabata hóben semper el a traha ku hóbennan den bario. Su ama tabata aktivo den bario di Buena Vista i el a traha ku hóbennan. I tambe na skolnan el a traha komo mentor. I e ta algu masha dushi, e ta algu otro i ta un trabou gradesido. Ora mira kon e muchanan ta biba i e ‘Talent Lab’ ta nan mes espasio. Nan a haña un unidat na Renaisance Mall ku a kooperá ku e proyekto aki. E ta un chèns pa e hóben sintié spesial i malkri’é, hasi tur kos bunita rònt di dje pa asina e por krea. Esei ta un trabou dushi. I ora e hóben ta krese. Lo no guia e hóben di un forma estrikto pero lo para ketu na su identidat. Si bo ke ta artista kiko bo ke terse den mundu pa impakto pi pa esaki lo tin Roland Colastica komo parti di e Kick Off pa traha ku e parti di identidat ku e mucha. Ser artista no ta solamente bisti, makiyá i kanta bunita pero tin algu di paden ku mester sali pafó.
Despues di 2 di yüli
Kiko lo sigui despues di 2 di yüli. Nos a toka e punto aki tambe ku Tamara. El a bisa ku nos a mishi ku algu den su mente. E tin pensá di sigui ku nan pasobra ta lástima pa traha 2 luna largu i kla pasobra por mira nan krese i pa despues laga nan bai despues di 2 luna. Ainda mester pensa den ki forma pero lo no laga e hóbennan los.
Oudishon final awe
E reakshonnan te ainda ta bini ku nan bishitanan na skolnan pero tambe via di medionan sosial i dor di entrevista ku medionan di komunikashon manera esun ku Djasabra. Nan tin Instagram, Tik Tok i FB di Talento pa mi Pais. I e mes tin un nètwèrk hopi grandi pasobra e ta kantante di hopi tempu i asina a yega na hendenan ku ta traha ku kos i ku hóbennan. I dia 9 di mei, esta awe djasabra lo tin e oudishon pa selektá un grupo chikí di entre 12 pa 25 aña pa bai den e talent Lab. I pa esun ku no logra e aña aki, lo tin mas chèns siguiente aña. E proyekto aki ta alkansabel riba www.mitalentocw.com.
Proyekto i evento
Tamara Nivillac banda di e proyekto aki ta hopi besig pero ménos ku kantamentu. Añanan promé el a hasi hopi ku kantamentu i a hasi hopi kos great pero awor el a drenta e temporada pa e tin tempu pa hasi e tipo di proyektonan manera esun di Mi Talento pa mi Pais. E ta trahando pa su mes i ta den e parti di evento, trahando ku organisashonnan, proyekto i evento ta su enfoke.
