Mia Tweed “Vibra” Sòpi di Palabra No tur ora nos mester ta di akuerdo ku otro pa sigui

193

Mia Tweed a presentá Vibra ku ta un kompania ku a keda lantá pa empoderá hende muhé. E ta keda hasí pa medio di entrenamentu, guia, eventonan ku e ta organisá pa hende muhé. Aña pasá el a organisá 3 evento pa hende muhé den kuadro di empoderashon. Den entrevista ku Djasabra Mia a splika kon bin e idea pa lanta Vibra i netamente dirigí riba e meta pa empoderá hende muhé.

Siña di otro

Mia a ripará ku hopi bia ora algu pasa ku hende muhé enpartikular no ta kombersá ku otro. Hopi bia e mesun problema i situashonnan, otro hendenan tambe a pasa den nan i na momentu ku por yega serka otro i kombersá por siña di otro. E mes a para den situashon doloroso i ora e papia ku otro e hende muhé e ta realisá ku e problema ta mustra mas grandi den su kabes ku enrealidat e ta.

 

Su promé aña

E aña  aki el a hasi e promé evento ku el a hasi entre konosínan di dje, den e di dos a konsentrá riba resilensia i e di tres konfiansa propio. E promé resilensia ta un habilidat importante pa hende por desaroyá. Resilensia ta bòns bèk. Bo ta fleksibel dor ku bo ta siña. E núkleo di dje ta ku bo ta siña di un eksperensia negativo ku bo a pasa aden. No solamente bo ta bin bèk pero tuma e eksperensia negativo i ménos bon i saka siñansa di dje na momentu ku nos ta asina leu pa saka siñansa di loke nos a pasa aden, nos lo ta hendenan hopi mas fuerte

 

Sigui krese

Mia a sigui splika ku e ta mira ku hopi bia ora algu pasa hende ta bisa pa stòp di papia di dje, ‘zand erover’ i ban sigui pero esei na su opinion no tur ora ta e mihó manera. Bo mester sinta i papia di algu te ora e no ta hasi doló mas i ku por papia habrí. El a duna komo ehèmpel un hende ta trapa otro su pia. Esun ku su pia a wòrdu trapá ta bisa ku no ta nada miéntras e ta sigui kunsumí paden siendo ku esun ku a trapa e pia por drei reakshoná wak kiko a pasa, kisas pone algu di remedi riba e pia i asina e lo bai muchu mas mihó. Esun ku su pia  wòrdu trapá mester drei bisa mesora si kisas su uña òf asta dede a sinti doló i no keda ketu i despues kunsumí paden. Asina ta yega na e siguiente stap den bida i sigui krese.

Resilensia

Resilensia segun Mia nos a kuminsá dor di puntra kiko e ta nifiká, kiko ta un hende resiliente. Tambe ta wak kon e mekanismo di atendé ku situashon ta. Tin hende ta rabia bai, un ta eksperensiá i tum’é otro. I asina ta bai wak kon a dil ku e kosnan segun tempu i el a realisá ku nos falta asertividat pa dil ku situashonnan. E ta algu segun Mia tòg difísil pasobra e persona ke bisa otro algu pero tin miedu pa e otro no tum’é na malu. Na momentu ku e hende hasi otro algu i no bisa nada ta nèt esei ta malu pa e relashon pa nan tur dos. No laga nada molestiá bu i keda kuné riba kurason pasobra e ta krea divishon i distansia. I no tur otro bo mester ta di akuerdo ku e otro pero niun di dos ta kulpa otro pasobra nan a kombens’é i tene kuenta ku otro su punto di bista. No tur momentu nos mester ta di akuerdo ku otro pa por sigui ku e relashon òf e kombersashon. Por papia i ta di akuerdo òf no di akuerdo.

 

Pronto na Kòrsou

E ta kere ku tin hopi pa logra ku otro i mester ta habrí pa realisá kiko ke logra. Mia mes ta biba na Boneiru i ta pensando pa duna algun tayer na Kòrsou e aña aki. Vibra tin kasi un aña ku el a lanta i e ta purba krese i ke bin duna e kursonan na Kòrsou. Ounke ta awor el a lanta, e ta kreando su nòmber i hañando kurpa si e mira e reakshonnan ku e ta hañando.

Palabra konsiente

I banda di e kursonan pa empoderá hende muhé Mia Tweed a krea Sòpi di Palabra. Ta trata di un pùzel di palabra i ta un buki di palabra pa buska palabra konsiente. Den esaki el a purba hiba aspektonan intangibel di nos kultura krioyo i tambe konsientisá hende muhé. Loke e ta krea di Vibra ta kosnan riba eksperensia propio. E ta gusta hasi e kosnan aki ku su mama i e ta kòrda na 2020 ku su mama será den kas nan tabata hasi hopi pùzel. I el a ripará ku bo ta keda ripití ripití i esei ta un forma di afirmashon ku ta algu ku bo ke logra. I asina el a introdusí e buki aki ku diferente tema den dje i palabranan ku mester buska. Nos por menshoná Mi Infansia; aki tin palabranan manera bai skol, baila, bati bleki, chabelita, klùr buki, plan di vakashon etc., etc. Un ku a hala nos atenshon ta Remedi Kasero; awa di maravia, basora pretu, beròm, blachi di sòrsaka, blachi di kalbas, bruska, chimichimi, moringa, stropi kalbas etc., etc. Ta un sòpi di palabra ku otro bo kaba di hasié bo ta sinti bu un tiki mas dushi. E pùzelnan ta un reto. E tabata ke pa hende buska i e mester ta algu great. Mia a menshoná un di e pùzelnan titulá Mi Infansia ku personalmente e ta gusta masha. El a bisa ku e tabata gusta e kantidat di mi tata su trùk i e tambe ta den e pùzel. Tin diferente kos den dje ku hende tabata hasi na chikí. Den e buki tin 29 palabra i kada pùzel tin 29 palabra. I ku e buki ta amplia desaroyo di palabra i ta traha riba e desaroyo di e persona mes.

Eksperensia kompleto

Mia ta kontentu ku e produkto aki. Hopi bia ta puntr’é kiko ta Vibra. E kier a bin ku un produkto otro. Su kreatividat ta den su kabes. Den su famia nan ta gusta obra di man i den su kaso el a krea e Sòpi di Palabra ku el a krea di su kurason. I ku e produkto aki ta sera konosí mas ku Vibra i kiko e ta ofresé. Vibra ta laga sera konosí ku otro. Kaminda e pone e tayernan e ta sòru pa ta un lugá dushi. Vibra ta para pa un eksperensia kompleto.

 

Optenibel

I despues di e promé Sòpi di Palabra, ya el a kuminsá ku e siguiente edishon i a kuminsá traha riba mas produkto. Entre otro un buki kaminda no solamente ta lesa pero hasi enkargonan. Sòpi di palabra ta disponibel na Joy by Opra, Bruna i Mensing’s Caminada.

 

Muhé bo ta balente

Mia Tweed a terminá ku e palabranan aki “muhé bo ta balente. Hopi biaha nos tin sierto inseguridatnan pero tur kos ta kuminsá na nos na momentu nos ta invertí den nos mes nos ta yena nos propio glas i por duna na otro. Muhé kuida bo mes”.

Mi ta sirbi bo un Sòpi di Palabra; a traha e sòpi aki ku e ingredientenan di amor propio, sentimentunan dushi i positivo. Bo ta kòrda kon djadumingu bo wela tabata traha bo sòpi preferí pa tur hende pasa i kome huntu? Saboriá e Sòpi di Palabra i deskonektá di bo telefòn, tuma un momentu pa bo mes. Sea ta na kas riba bo sofá òf na laman drumi den un dushi sombra. E sais di e sòpi aki ta pas perfektamente den bo tas faborito. E ta fásil pa bai kuné na e lugá kaminda bo ta gusta sinta òf drumi rilèks. No wòri, e sòpi lo no fria!

 

 

LAGA UN KOMENTARIO

Please enter your comment!
Please enter your name here