Port-au-Prince.-Tin un ambiente di miedu i ansiedat atrobe den kayanan di e siudat prinsipal di Haiti, despues ku por a skucha tiramentu intenso na vários parti di e kapital haitiano. Agensianan di notisia Efe ta informá ku e área metropolitano di Port-au-Prince tabata kompletamente paralisá despues ku e lider di e gruponan “Vivre Ensemble” Jimmy Cherizier konosí komo ‘Barbeque’ a hasi menasa di posibel atakenan den vários bario di e kapital.

Awe djamars 4 di febrüari tur skol a keda sera, i vários instituto públiko i priva no a habri mes. Transporte públiko tampoko no ta funshonando pa gran parti awe. Esnan ku ta lora man ta move pero na un paso hopi mas lento ku normal.

E poblashon tin miedu i hopi ansiedat kada bia ku nan skucha tiru den kayanan di e kapital. Ya kaba a kumpli mas ku un aña ku e gruponan a tuma kontrol den e pais. Komo motibu di esaki hopi hende a hui bai laga kas atras pa nan bai buska refugio den kampamentu i siudatnan den e provinsianan.  Segun informe, polis nashonal di Haiti ta den estado di alerta máksimo despues ku ministerio di hustisia a saka un alerta.

LAGA UN KOMENTARIO

Please enter your comment!
Please enter your name here