Tambe mester prepará elekshon pa direktiva i lider polítiko nobo
WILLEMSTAD.- E reunion general di Partido Nashonal di Pueblo (PNP) a tuma lugá porfin djaluna 11 di mei último despues ku e siman promé presidente, Dudley Lucia a kanselá e reunion sin ku el a habri esaki ofisialmente i a duna oportunidat pa miembronan ku tabata pará den rei pa registrá i drenta sala di reunion. E punto prinsipal ku a sali for di e reunion di djaluna ta, ku falta klaridat riba situashon finansiero di pais, ku mester kuminsá mas lihé posibel ku e proseso pa eligí miembronan nobo di direktiva i ku ta mester traha riba profil di un lider polítiko nobo.
Di otro banda e reunion a demostrá ku e partido tin un base fuerte ainda di miembronan ku al final ta keda buska un manera kon pa manehá e partido mas mihó posibel i di forma demokrátiko. Ounke ku e situashon no ta manera mester ta, ainda PNP tin sierto strukturanan ku ta garantisá sobrebibensia. Pero, e preokupashon mas grandi di e miembronan durante e reunion di djaluna último tabata klaridat finansiero i responsabilisashon di uso di medionan finansiero, inkluso e kontribushon ku ta paga.
Direktiva ainda no por a presentá ku un kuenta anual i tampoko tabatin un relato di sekretario. Miembronan a indiká ku direktiva mester sigui traha riba esakinan i presentá nan mas lihé ku ta posibel. Den e kuadro aki a instalá un komishon di kaha nobo, ku e tarea pa kontrolá e kuenta anual, spesífikamente e areglo di kontribushon, i konsehá miembronan unabes ku esaki ta kla.
Pa e reunion di djaluna último e asuntu di quorum no tabata di importansia. Apesar di esaki e sala di reunion di Kas di Pueblo na Sta. Maria tabata yen, pues e reunion tabata bon bishitá. Motibu pa 28 miembro for di yanüari último a pidi un reunion general urgente tabata loke nan ta konsiderá ‘mal maneho’ di e partido, falta di komunikashon interno, i un direktiva ku ta ilegal konforme stipulashon di statutonan i ku no ta tene su mes tampoko na otro stipulashonnan statutario manera yama reunionnan general pa informá miembronan.
Miembronan tabata reklamá por ehèmpel ku ta den prensa mester lesa ku tin miembro di direktiva a tuma retiro, miéntras ku no tin komunikashon interno. Durante di e diskushonnan ku a tuma lugá djaluna último a bin dilanti ku algun miembro di direktiva ku pa diferente motibu a tuma nan retiro durante último lunanan, a bini bèk riba nan desishon i drenta direktiva atrobe i asina tin un direktiva atrobe ku ta konsistí di 7 persona atrobe ku ta e kantidat mínimo manera stipulá den statutonan.
E partisipashon aki a lanta interogatorio bou di miembronan pasobra konforme e mesun statutonan ora un miembro di direktiva tuma su retiro e mester apliká di nobo pa drenta direktiva. Pa e motibu aki sala a disidí ku mester kuminsá ku e proseso pa habri kandidatura pa elekshon di direktiva ku mester tuma lugá na òktober awor. Di e forma aki e eksigensia di miembronan pa e sobrá di e direktiva ku tabata den funshon baha, a kita for di riba mesa.
Otro punto ku sala a duna su opinion kla i raspá riba dje ta e posishon di lider polítiko. Ruthmilda Larmonie-Cecilia aña pasá a pone su posishon komo lider na disposishon di partido. Segun prosesonan normal den seno di PNP, direktiva a tuma e desishon di Larmonie-Cecilia den konsiderashon miéntras ku ta bai hasi e preparashonnan pa enkaminá e proseso pa yega na un lider polítiko nobo.
Djaluna a bolbe hasi un apelashon riba Larmonie-Cecilia pa e keda den e funshon di lider polítiko miéntras ku mester inisiá e proseso pa stipulá un profil pa un lider polítiko pa asina kandidatonan ku por solisitá riba e funshon aki.
Otro punto ku a para ketu na dje ta e komishon ku ta eksistí di prominentenan di partido manera eks lider polítiko, Maria Liberia-Peters, èks minister, Joan Brewster i dosente na Universidat di Kòrsou, Angelo Reenis. E komishon a haña komo tarea pa hasi un análisis di e situashon den partido i pa presentá rekomendashon pa e direktiva. Ta spera ku e komishon lo presentá ku su rapòrt den 1 luna di tempu.
Na final a disidí ku ta sera e reunion i yama un reunion nobo pa duna informashon mas aleu na miembronan riba tur e puntonan pendiente, inkluso e areglo di kontribushon, demas puntonan di agènda ku no a logra trata djaluna último, mail ku pregunta di miembronan ku direktiva ainda no a kontestá, i relato di sekretario. Ounke ku no a fiha un fecha ainda ki dia ta yama e reunion. Sala pa e motibu aki tabata preferá pa a suspendé e reunion i kontinuá kuné ora ta asina leu pa asina evitá disputa atrobe ku direktiva tokante quorum pa e reunion.
Den un komunikado di prensa emití pa PNP ta bisa ku durante e reunion direktiva a duna un rekuento amplio di tur e trabounan ku e la bin ehersé den último tempunan, pa sigui ku e trayektoria di 78 aña di Partido Nashonal. “Durante reunion miembronan por a trese nan preokupashonnan dilanti, kaminda direktiva a komprometé su mes ku den un lapso kòrtiku di tempu lo bolbe bini huntu den un reunion general di miembresia pa sigui informá riba e desaroyo di e trabounan den nos Partido. Finalmente tur miembro a reafirmá nan kompromiso ku PNP i mustra ku e Kousa di Partido Nashonal ta mas grandi ku kualke diferensia di opinion.”
