Karta di Knops pa Tweede Kamer
WILLEMSTAD.-Den un karta ku sekretario di estado Raymond Knops a manda awe djabierne 26 di mart pa Parlamento ulandes, e ta duna informashon riba desishon ku kai den Konseho di Minister di Reino pa loke ta trata e nesesidat di yudansa finansiero pa Kòrsou, Aruba i Sint Maarten. Manera ta konosí Ulanda a sera un akuerdo riba e asina pakete di paisnan, ku e paisnan menshoná na final di 2020. Den e akuerdo aki a stipulá ku e paisnan mester implementá medidanan pa asina nan por bini na remarke pa hana mas yudansa finansiero. Knops den su karta ta enfatisá ku e ‘landspakketten’ ta bon pa drecha e situashon finansiero, ekonómiko, institushonal i tambe reforsá e sosiedatnan aki di manera ku nan lo por enfrentá shòknan eksterno mas mihó. Covid a dal tur e paisnan aki hopi duru.
Den reunion di Konseho di Minister di Reino di awe a papia riba e posibilidat pa laga e paisnan desviá for di e normanan di presupuesto manera esaki ta stipulá den e lei di konsenso ku ta trata asuntunan finansiero pa Kòrsou, Sint Maarten i tambe e Landsverordening Aruba financieel toezicht. Tambe a papia riba e ayudo di likides pa e di dos kuartal di 2021.
Pa loke ta trata Kòrsou e sekretario di estado a splika Tweede Kamer ku Cft a konstatá ku e pais no ta dispone di sufisiente likides pa kubri e di dos kuartal di 2021. E konklushon ta ku miéntras ku Kòrsou no fiha e leinan ku mester drenta na vigor, e pais aki lo no por sigui konta ku ta haña yudansa finansiero. Mas detaye den edishon di EXTRA.
