Hensley Martina; Fundashon Escuela KoHeHe
Fundashon Escuela KoHeHe ta para mas pa agrikultura. Ta usa agrikultura pa edukashon i formashon prinsipalmente di mucha i hende grandi. Agrikultura ta inkluí tur balor nesesario pa un hende, tantu kuido, speransa, lucha, amor, tur e balornan. Ta balornan esensial den bida di hende. KoHeHe a lanta a 2000 i Hensley Martina mes a kuminsá traha trabou boluntario algun aña promé ku el a lanta fundashon KoHeHe. E tin 25 aña ta trahando trabou boluntario i awor kompletamente ku KoHeHe.
Motivashon i boluntat
Hensley Martina den kombersashon ku Djasabra a splika kon e ta logra su vishon i meta. El a bisa ku na promé lugá e mester tin e motivashon i boluntat. Na kaminda hende ta motivá pa sigui pasobra riba kaminda bo ke entregá debí na falta di fondo. Den e tempu di awendia kos ta difísil i mester di sèn pa kasi tur kos i si no tin boluntat ta laga kos para.
Carlito mi tawela
Hensley a bisa ku el a lanta chikí den plantashon. Su tawela Carlo Abath Martina tabata un agrikultor i tambe un lider den polítika. E tempu ei tabatin shon na Landhuis Sta Cruz. I bisiñanan a konta Hensley ku e tempu ei tabata yega kehonan serka Carlito, su tawela, riba shonnan. Su tawela ta subi buriku i pone òrdu. E por komprondé ku su tawela mester tabata bon den su hulandes, sino e no por a pone òrdu. E tabata un gran lider den Sta Cruz i ki ora doktor tabata pone enkuentronan, tabata na kas di Carlito. I segun Hensley ora e mira kon su tawela tabata e por konkluí ku el a heredá esaki di dje. El a lanta den kas di su welanan Carlito i Isabel i promé ku su tata a traha kas ta serka nan e tabata biba. El a keda formá pa su welanan. I na grandi el a haña sa ku su tawela tabata den polítika.
Fo’i chikí den plantashon
Konsekuentemente ku esaki Hensley a bisa ku plantamentu a lanta den dje. For di chikí e ku su rumannan tabata planta. E ta kòrda kon na chikí nan ta hunga karta i e ruman ku gana ta bai den e plantashon di e otro ruman pa e skohe su premio, ku hopi bia ta fruta. Asina na grandi, den su adolesensia el a alehá un tiki pero segun el a sigui krese, 25 aña pasá el a bai bèk den agrikultura. Hensley ta kòrda ku el a bai kurso avansá na Landhuis Kenepa serka Jean Henriquez. E ta gradesí sra. Jean pasobra na 2007 el a enkargá Hensley pa duna e formashon di agrikultura na gruponan ku tabata bishitá e lanthùis.
Habilidat skondí
Na 2007 ora Hensley a keda aserká pa e duna e formashon di plantamentu aki, el a keda straño dikon e tin di hasié, pero Jean a bis’é ku e por. E tempu ei e tabatin KoHeHe kaba. Einan el a deskubrí su habilidat skondí di duna lès di agrikultura. E kos a sigui kana te asta Aruba e ta duna lès di agrikultura. Na 2016 el a haña yamada na Aruba pa ta un di e oradornan i su tarea tabata pa konsientisá e studiantenan e balor di agrikultura. Esaki a dura un siman largu. Na 2017 tambe el a bai Aruba i despues un trahadó sosial ta yama Hensley ku a pidié pa bai prisòn Kia pa papia ku hóben i motivá nan i duna nan speransa. Asina Hensley a hañ’é na prisòn di Aruba tambe ta duna formashon.
Les na Aruba
Tambe el a duna lès den opvang Trai Mèrdia na Aruba. Nan tabata ke pa e duna formashon na e lidernan pa nan por pas’é over pa e muchanan. Hensley tabata ke sa sinembargo ku ki meta nan tabata ke pa e duna e formashon i lèsnan ei. Asina Hensley a kuminsá ku 18 lider i a duna yen kaso di kosnan ku ta pasa na skol etc., etc.. Segun e tabata papia el a ripará ku e lidernan no konosé e muchanan i no sa ki defisiensia tin bou di e muchanan. Asina el a duna tarea pa investigá e defisiensia serka e muchanan pa e por a sigui traha ku nan.
Sagrado i amplio
Agrikultura ta algu sagrado i amplio. E por yuda asta den preshon di grupo, pa mehorá komunikashon entre gruponan, pa eliminá strès. Na Colombia ta usa agrikultura pa trese harmonia i pas. I netamente papiando di hóbennan ku ta agredí otro na skolnan, Hensley a bisa ku na 2021 el a manda karta pa parlamento di Kòrsou pa pidi pa ahustá lei pa agrikultura bira materia na skolnan. Una bes e mucha hasi agrikultura e ta trese pas, pasobra e ta eliminá strès, loke a keda demostrá mundialmente. Agrikultura ta engrandesé bo grado di pasenshi i p’esei Hensley por traha ku grupo di muchanan. I trahando ku mucha, ora e ta hasi fèrfelu den klas tur kos ta dependé ku ki bista ta wak e mucha; si e ta kansa hende òf e mester di yudansa i ku e bista ei ta duna e yudansa. Hensley a duna kurso di agrikultura na skol na Koral Specht. E tabata prepará pa e skol ei, sabiendo ku tabata muchanan basta difísil pa atendé kuné. Pa motibu di falta di fondo, KoHeHe no ta duna formashon mas di agrikultura na e skol aki, apesar di e kambio ku asta el a sòru pe. Pa loke ta e karta ku el a manda ei Hensley no a haña reakshon. Na Kòrsou no ta wak e mensahe pero ta wak e mensahero. Si e mensahero ta pober i no tin bon trabou nan no ta bai su tras. Ta un lástima segun Hensley ku Aruba a duna mas atenshon ku Kòrsou mes.
Hinka agrikultura den skol
Agrikultura ta liber i si mucha por sintié manera e ta, a base di esei por deskubrí su defisiensia i problema. Ora e mucha ta den klas i tin di tene na regla so, no por konosé ki falta e mucha. Ora lag’é den libertat por yuda e mucha. E agresividat bou di mucha di skol Hensley ta bisa ku si no pone agrikultura na skol e agresividat por sigui. Hopi bia mucha ta bai skol ku kamber, tin un motibu dikon e mucha ta bira agresivo. Por ehèmpel e parti di alimento ta hunga un ròl grandi. E mucha ku su preokupashon na skol, amigu ta hasi mal wega kuné, esei ta pone ku e mucha por rabia i bira agresivo. Mucha tambe ku ta mira e problema di mayornan na kas tambe por kousa strès serka e mucha ku e ta bah’é na skol.
No warda e baka hoga na pos
Kiko agrikultura por nifiká pa nos tur? Ta poniendo sufisiente balor na dje? Hensley a splika ku no ta poniendo sufisiente atenshon na agrikultura. Mayoria bia hende ta warda te ora baka hoga na pos ta kue kurpa. Por ehèmpel temporada di covid hopi hende kier a planta pasobra nan ta será den kas. Ora tur kos a pasa, a lubidá agrikultura i kue fiesta bèk. Hopi hende no ta konsiente kuantu kos agrikultura por hasi. Hensley mes ta den su kunuku tur dia. E mester sòru pa ora e mucha bin serka dje e tin kos di mira i por haña un plancha pa bai kuné pa e sigui trein. E manera ku e ta duna lès ta di kalidat.
Kalidat
Hensley a bisa Djasabra ku el a traha duru pa e logra e nòmber ku e tin awe a base di agrikultura i p’esei e ta konosí na Aruba pa su kalidat i e tin di wak pa e kalidat ei no keda tachá i e tin di mantené su kalidat haltu. E ke pa hende tin rèspèt pa agrikultura. Miéntras na Kòrsou no ta konsiente di e balor di agrikultura, lo no yega leu, segun Hensley Martina.
Balor di agrikultura
I banda di tur esaki mester tene kuenta e balor di agrikultura pa kombatí hamber. Esaki pasobra tin pais ku no ta eksportando nan fruta mas i ta tené pa nan mes. I si aki no ta praktik’é, nos lo haña skarsedat di e frutanan ku nos ta dependé di dje ku ta bin di eksterior. Hopi bia no ta duna KoHeHe rason pero na 3 okashon nan a spièrta ku e barkunan di fruta venezolano ta bai i nan a bai, despues nan a bin bèk i KoHeHe a bolbe spièrta ku nan ta bai i nan a bai tambe, awor nan tei bèk i KoHeHe ta bolbe spièrta ku nan lo bolbe bai. Na Venezuela tin mucha ku tin di kome pero ku no tin ni kuminda pa nan mes.
