SIUDAT DI MEXICO, AP.- Mas o ménos 500 migrante sentromaerikano a sali di Siudat di México pa embarká den e etapa mas largu i peligroso di su biahe rumbo pa frontera di Merka. Míles di migrante a disidí pa warda un dia mas den un refugio den un stadion.
E grupo a reuní nan poseshonnan i a sali den metro rumbo pa e parti nort di e siudat i despues a kana riba outopista kual polis a eskoltá.
Pa mayoria, esaki tabata promé biaha den metro. Nan no tin konosementu di e ruta pa Tijuana tampoko, kaminda nan ta dirigí.
Carlos Castananza di 29 aña, a wòrdu deportá pa manehá sin lisensia despues di un dékada di trabou na Connecticut. Castanza ta desesperá pa bolbe ku su dos yunan nase den Merka. “Mi kier a regresá mas di un aña pasa, pero mi no tabata por”, asina el a bisa. “P’esei mi a uni e karavana”.
Entre 4.000 i 5.000 migrante tabata wardando impasiente den e stadion deportivo Jesus Martinez.
Míles di migrante a pasa nan último dianan deskansando, hañando atenshon médiko i nan ta debatiendo kon pa prosedé ku su kaminata den Sentroamerika i México kual a kuminsá den òktober.
Representantenan di e karavana a reuní ku funshonarionan di ofisina lokal di Nashon Uní i a eksihí bùs pa transportá nan pa frontera.