PORTLAND, AP.- Diferente afrikano ta skapa di violensia i pobresa i a disidí pa evitá di yega Europa i usa un ruta nobo i mas largu, pero mesun peligroso atraves di Suramérika den un intento pa yega Merka. Nan a opta pa e ruta aki mirando ku e migrantenan afrikano ta wòrdu rechasá pa Europa, òf nan ta hoga den Mediteráneo òf ta konfrontá rasismo.
Despues di un konflikto arma den su pueblo, Repúblika Demokrátiko di Congo, Blaise Matshieba Nduluyele a disidí pa skapa di un atake. Diferente persona, inkluyendo algun miembro di su famia a wòrdu asesiná.
Su famia a sigui avansá, enfrentando morto riba un rekorido den Suramérika rumbo pa Merka. Nan tabata drumi den mondi òf riba kaminda. Nan a bira malu i kasi a muri di hamber, i tabata deskubrí kadavernan kantu di kaminda riba nan ruta.
Mas di 500 persona a wòrdu asesiná durante tres dia di konfrontashon despues di morto di un hefe tribal den kapital di Kinshasa, segun Nashon Uni.
E famia a biaha di Angola pa Ecuador, i a start un rekorido di tortura di kuater luna den Colombia, Panama, Costa Rica, Nicaragua, Honduras, Guatemala i México.
