Polis nashonal di Liberia pendiente yegada di un avion ku lo yega Roberts International Airport for di Merka kargá ku strañeronan deportá for di e pais.
MONROVIA, Liberia (AFP).- Sinku di e 20 migrantenan ku Merka a deportá pa Liberia a nenga di baha for di avion. Liberia ta un dje paisnan afrikano ku ta tuma migrantenan ku Merka ta saka for di e pais pero ku no por fòrsa nan pa bai nan pais di orígen. E deportashonnan ta forma parti dje kontroversial kampaña di represhon migratorio di Donald Trump.
Un siman pasá, Liberia a anunsiá di lo risibí te ku 1.200 siudadano estranhero deportá for di Merka i esaki den periodo di un aña. Un promé grupo di 20 persona djaweps último mester a yega e pais pober den parti wèst di Afrika.
Pero un fuente dje gobièrnu liberiano a konfirmá pa AFP ku sinku pasahero a nenga di baha for di e avion. Den deklarashonnan na prensa, e minister liberiano Jerolinmek Matthew Piaha, a limitá su mes na bisa ku e sinku personanan en kuestion no a keda entregá. “No, no ta keda na nos pa splika kiko a pasa”, di akuerdo ku su reakshon.
Segun prensa merikano, e sinku personanan finalmente a bai Guinea Ekuatorial, pais ku for di novèmber último a tuma 50 persona ekspulsá for di Merka.
Liberia siman pasá a bisa ku “esnan deportá ta liber pa sali for di e pais ora ku nan ta deseá esei òf pidi asilo”. Gobièrnu liberiano ta sigurá di “no ta eksigí ni risibí kompensashon òf promesa di parti di Merka.
Pero di akuerdo ku New York Times, Merka hasi un pago di US$5 mion na Liberia, di akuerdo ku dokumentonan aprobá pa Departamento di Estado. Piah, di su parti, a bisa ku gobièrnu di Liberia “lo no gasta ni un sèn den nada relashoná ku e 1.200 personanan kendenan lo yega e pais” i ku “gobièrnu di Merka lo ta enkargá ku e parti ei”.
