TUNESIA, TUNESIA, AFP.- Kantidat di migrante inkluyendo beibinan a bai refugiá na entrada i den interior di embahadanan despues di a keda ekspulsá di nan kas debí na medidanan nobo ku e pais a tuma kontra migrantenan sin dokumento.
Dilanti di embahada di Costa de Marfil na kapital di Tunesia, kantidat di persona a bai kamper ayera riba yerba, inkluyendo 11 beibi i un muhé na estado. Ku dekennan i rondoná di saku, algun a drumi ya pa kuater dia kaba, segun AFP a konstatá.
“Nos mester di bruki, lechi di fórmula, nos no tin nada pa kome”, asina Rokhia Kone di 23 aña a lamentá, kende tabatin su yu kargá riba su lomba. Vários hòmber a mustra pannan duru splikando ku esei lo ta nan úniko kuminda di mèrdia.
E presidente tunesino Kais Saied a anunsiá dia 21 di febrüari medidanan urgente kontra e imigrashon ilegal supsahariano, inkluyendo e ekspulshon di kas i di trabou di esnan ku no tin dokumento reglá, òf nan por haña butnan pisá si nan hasié tòg.
“Unda e asosiashonnan, Krus Kora, organisashonnan internashonal manera Acnur i OIM ta? Ta un bèrgwensa pa e tunesionan”, asina e aktivista Monia Ghozali Khraief a bisa na AFP.
