HUIXTLA, MEXICO, AP.- Míles di migrante sentroamerikano a reanudá nan marcha pa Merka. Nan a sali promé ku solo a sali pa asina kubri 75 kilometer di e mas di 1.600 ku nan falta pa logra nan destino.
E kansansio di sinku dia di kaminata na sùit di México, despues di shete dia na Honduras i Guatemala a kuminsá mustra su efektonan. Outoridat mehikano a informá djárason ku 500 migrante a aseptá un oferta pa regresá nan pais den bùs. Mayoria a bira malu òf tabata simplemente kansá, spesialmente e muchanan.
Sinembargo, e tamaño di e multitut no a bira mas chikitu na momentu ku e multitut a sali mardugá pa kontinuá ku nan marcha.
E muchanan ta representá sinku pa dies porshento di e migrantenan, pero nan ta klaramente e forsa tras di e motivashon di e marcha.
Ounke e gobièrnu a desanimá e grupo debí na e menasanan di presidente Donald Trump, e migrantenan a haña gran kantidat di yudansa di e pueblo lokal segun e marcha tabata pasa. Trump a menasá di terminá yudansa finansiero na paisnan sentroamerikano si e gobièrnu no hasi nada.
