CIUDAD DE MEXICO, MEXICO.- Pa Juan Carlos Molina, un hondureño di 23 aña pegá na Mexico na mitar di su eksodo direkshon pa Merka, no tin otro alternativa: “Nos ta wardando pa nan aktivá e treinnan”, e úniko medio ku e tin pa yega su destino, pero ku awor ta wantá pa motibunan di seguridat.

“Asina tin informashon  ku e trein ta funshoná, nos lo sigui”, segun e hondureño ku a keda pegá den su intento pa yega frontera ku Merka for di momento ku e trein den Ciudad de Mexico a baha su operashon ku 30%.

Míles i míles di venezolano, hondureño, guatemalteko i salvadoreño ta riba kaminda direkshon pa frontera ku Merka.

E meta, segun e instituto nashonal di migrashon (INM) ta pa “evitá ku e personanan migrante ta pone nan bida na riesgo” den e treinnan, den kua nan ta hasi e biahe i for di kua kaida i mutilashon serio ta sosodé ku frekuensia.

Un kantidat rèkòrt di kasi 233.000 migrante a krusa e frontera ku Merka den luna di ougùstùs, segun datonan ofisial. Esei a trese kuné ku outoridatnan di Texas a disidí na fortifiká su frontera ku kantidat grandi di militar i ‘prikkeldraad’.

Migrashon di Mexico a konfirmá djabièrnè último ku pa loke ta bai e luna’ki, nan a para 189.000 migrante, ku ta un promedio di nuebe mil pa dia.

“No tin kapasidat pa atendé tantu hende i di mes, komo ku nan no por drenta, nan ta hasi nan nesesidatnan riba kaya, drumi riba kolchon sin dak riba kabes”, segun a keda denunsiá.

LAGA UN KOMENTARIO

Please enter your comment!
Please enter your name here