SIUDAT DI MEXICO, AP.- Míles di migrante sentroamerikano tabata deskansá den un stadion deportivo den Siudat di México djárason. Mayoria migrante ta konsiderando pa aseptá di keda den México òf kontinuá ku nan marcha pa frontera di Merka.
Kasi 4.500 migrante ta kongregá den stadion Jesus Martinez despues di un rekorido dor di tres pais den tres siman. Outoridat den e kapital mehikano a señalá ku e sentro deportivo lo yena ku 5.500 migrante.
E migrantenan a para den rei muchu mas promé ku 8or di mainta pa haña kuminda, miéntras trahadónan tabata deskarga bòternan di awa i kuminda bou di un tènt grandi.
Na momentu ku e donashon di pañanan a yega, mayoria migrante a purba haña karson i blusa manga largu pa wanta friu.
E miembronan di e karavana a ninga di tuma un desishon inmediato riba e kontinuidat di nan marcha pa nort.
E hondureño Franklin Martinez di 46 aña kier yega New York, pero el a pidi refugio pa keda den México. “Aworakí tin un ola antiinmigrante. Nos no ta wòrdu bon risibí na frontera”.
México a ofresé refugio, asilo òf visa di trabou na e migrantenan. E gobièrnu a indiká di e emití 2.697 visa temporal na individual òf famianan miéntras nan ta warda riba e resolushon di e proseso di solisitut di un status permanente, kual ta dura 45 dia.
