Promé grupo di nigerianonan kla pa bandoná Suráfrika i asina skapa di violensia kontr’í nan.
LAGOS, Nigeria (AFP).- Un grupo di nigerianonan repatriá for di Suráfrika despues di e oumento di atakenan anti inmigrantenan a yega Lagos. E violensia kontra di strañeronan a oumentá den Suráfrika, kaminda gèngnan armá ku palu i zuip a marcha pasa den algu zona pa reklamá pa e personanan sin dokumento di residensia salí for di e pais promé ku 30 di yüni.
Strañeronan ta denunsiá intimidashon di parti di esnan ku ta pasa di porta pa porta. Pa motibu dje menasanan hopi famia a bai. Ghana, Mozambque i Malaua ya a repatriá algun shen siudadano den último simannan.
Suráfrika ta un dje ekonomianan mas grandi di Afrika i ta konta ku mas ku 3 mion strañero, algu mas ku 5% dje poblashon segun e agensia nashonal di estadístika. Pero desempleo ta riba 30%, loke ta krea malkontentu pa e presensia di trahadónan migrante.
Un avion charter ku a transportá 262 nigeriano a aterisá ayera na Lagos i un otro grupo lo keda evakuá 15 di yüni. Alrededor di 1.000 migrante a ekspresá nan deseo pa bandoná Suráfrika, segun gobièrnu nigeriano.
Outoridatnan surafrikano a bisa di a atendé dokumentonan pa 580 nigeriano por sali for di e pais i ku nan tur tabata di forma ilegal den e pais. Nan tur awor tin ku sali i pa un periodo di sinku aña no por regresá Suráfrika.
