WASHINGTON, MERKA, AFP.- E visepresidente di Merka Mike Pence i su susesor, Kamala Harris, a kombersá na telefòn djaweps, segun indikashon di un fuente na AFP.
Pence ta siguiendo ku e transishon presidensial apesar ku Donald Trump a oponé i ninga di rekonosé su derota elektoral.
No tabatin detayenan di e diálogo ku a sosodé sinku dia promé ku Biden inougurá komo presidente ofisialmente.
E korant the New York Times a informá ku Pence a felisitá Harris. Ta promé biaha ku nan a papia desde e debate di kandidatonan pa visepresidente den e kampaña elektoral último, segun indikashon di Times.
Trump no a tuma kontakto ku Biden pero a primintí un transishon sin problema, Trump a hasi e komentario aki despues ku su siguidónan a ataka Capitol riba 6 di yanüari, kual a resultá den un segundo ‘impeachment’ kontra Trump.
Pence a anunsiá ku e lo presensia e seremonia pa entrega mando na Biden, kual ta tuma lugá riba 20 di yanüari. Un funshonario a konfirmá na AFP ku Trump lo biaha pa Washington djárason trempan, algun ora promé ku e huramentashon kuminsá. E lo biaha pa Mar-a-Lago den Florida kaminda e tin plania di keda temporalmente.
E relashon entre Trump i Pence a deteriorá despues di e insidentenan den Kongreso. Trump su siguidónan a protestá i ataká Capitol na momentu ku Pence tabata guiando un seshon pa sertifiká triunfo di Biden.
Trump a pidi Pence pa blòkia e seshon aki, kual e visepresidente a ninga di hasi mirando ku e no tin outoridat konstitushonal.
