BUENOS AIRES, Argentina (AFP).- E presidente argentino Javier Milei a kalifiká e gobernante venezolano Nicolas Maduro, di ta “un diktador kriminal”. El a hasi esei durante di un diskurso ayera den kual el a denunsia e “sekuestro ilegal” di un gendarme argentino ku a keda detené un siman pasá ora ku el a drenta Venezuela for di Colombia.
Nahuel Gallo, miembro di Gendarmería Nacional Argentina (GNA), di 33 aña, “a keda detené pa forsanan di seguridat dje diktador kriminal Nicolas Maduro pa e úniko delito di a bishitá su pareha i su yu”, Milei a bisa refiriendo na “sekuestro ilegal” dje gendarme. “Nos ta eksigí liberashon inmediato i lo usa tur via diplomátiko pa e por regresá Argentina sano i salvo”, segun Milei.
Mas trempan e minister di seguridat argentino, Patricia Ullrich, a kalifiká e detenshon komo “un akto kasi di guera”, despues ku Caracas a konfirmá e aresto supuestamente pasobra el a yega Venezuela pa “kumpli ku un mishon”.
Di su parti, e kansier argentino, Gerardo Werthein, a bisa na Radio Mitre ku e suseso aki “ta krusa tur e límite”.
Djabièrnè kansieria a anunsiá ku Gallo a keda demente na Venezuela despues di a drenta via di Colombia pa bishitá su pareha i nan yu, ku ta kumpli dos aña den yanüari.
E señora, Maria Gomez, a bisa prensa lokal ku e ta na Puerto La Cruz ku e yu “pa motibunan personal” ya pa shete luna i ku dia 8 di desèmber tabata su último kontakto ku Gallo.
E minister di Interior di Venezuela, Diosdado Cabello, a rekonosé djaluna ku e gendarme a keda arestá, sin duda detaye. “Kiko el a bin hasi na Venezuela? “El a bin kumpli ku un mishon”, segun e minister.
