NEW YORK, MERKA, AFP.- Míles di aktivista a sali den kayanan di Merka djasabra pa eksihí akseso safe i legal na aborto.
E manifestashonnan a wòrdu organisá despues ku un votamentu a wòrdu filtrá pa medionan di komunikashon, mustrando ku mayoria konservador di Korte Supremo ke anulá e lei Roe v. Wade ku a keda establesé na 1973 pa garantisá akseso na aborto na nivel nashonal.
“Niun hende tin derechi di tuma un desishon riba kurpa di un otro”, asina Hanna Williamson, un manifestante di 20 aña, a bisa na AFP.
E marcha di alrededor di 3000 persona a wòrdu enkabesá pa senadornan demókrata Chuck Schumer i Kirsten Gillibrand, inkluyendo demókratanan influyente ku a kansa huntu ku e manifestantenan bistí na bèrdè, e koló simbóliko di aktivismo na fabor di aborto.
“Nos lo sigui lucha te dia nos gana”, asina Schumer a bisa na AFP.
Míles di persona mas a manifestá na Texas i Kentucky i otro partinan di e pais den konsentrashonnan mas chikitu.
