Míles di hende riba kaya ayera atrobe, ekspresando nan sosten na Nicolás Maduro kende su kaso a keda presentá ayera den korte na New York. Pa medio mart e mester bolbe komparesé den sala di korte.
CARACAS, Venezuela (AFP).- Míles di persona a marcha ayera den Caracas pa eksigí liberashon dje presidente Nicolas Maduro, kapturá den un akshon militar di parti di Merka. E manifestashon a konsentrá serka di Parlamento venezolano, kaminda Delcy Rodriguez a huramentá komo presidente enkargá. E tabata vise presidente i e promé den liña di suseshon.
“Maduro wanta duru, Venezuela ta lantá”, segun e manifestantenan tabata grita. “Trump, Marco Rubio… asesinonan sekuestradó. Unda e hustisia berdadero di Merka ta?”, segun pankartanan a bisa. Nan tabata karga bandera di Venezuela i tambe di ‘Super Bigote’ i ‘Super Cilita’, personahenan di propaganda inspirá pa Maduro i esaki su kasa Cilia Flores, tambe arestá pa Merka.
Nicolas Maduro Guerra, yu dje presidente, a bisa den un diskurso ku e tabatin un komunikashon indirekto ku su tata. ”Mi no por bisa nada mas. “Nos tin un bon ekipo ku ta apoyando nos i ta yudando pa defendé nos dignidat”, segun e yu di Maduro, konosí popularmente komo “Nicolasito”.
Maduro a keda presentá ayera dilanti di un wes den un tribunal di New York, kaminda el a deklará su mes no kulpabel di delitonan di narkotráfiko i terorismo. “Independientemente si Nicolás Maduro tin algu ku hustisia, esaki no tabata e manera pa e hasi e kos aki”, segun un siudadano.
“Nos ta marcha pasobra nos ke demostrá na mundu ku nos presidente i nos promé kombatiente, Cilia Flores, no ta nan so. “Tin un pueblo ku ta dispuesto pa sakrifiká nan bida pa nan”, segun otro siudadano a duna di konosé.
