WASHINGTON.- Desena di míles di aktivista anti- abortùs ayera a desafiá e friu pa manifestá na Washington den un marcha anual, selebrá dianan despues di regreso di Donald Trump den White House.

E di 52 edishon di e “Marcha pa Bida”  a keda selebrá un dia despues ku e presidente republikano a pordoná 23 anti-abortista prosesá bou dje gobièrnu di e demokrat Joe Biden.

Trump djabièrnè tabata di biahe den North Carolina (ost)  i California (west), pero a dirigí su mes na e manifestantenan via di un mensahe di vidio grabá.

“Den mi di dos mandato,ku orguyo nos lo bolbe defendé e famianan i bida”, el a bisa.

“Lo nos protehá e avansenan históriko ku nos a logra i nos lo para e impulso demokrat radikal pa un derecho federal di aborto, esaki ta na momentu di nasementu i inkluso despues di nase”,segun el a bisa.

Ku esei e presidente ripití ku su rivalnan ta na fabor pa mata beibinan despues di nasementu, un afirmashon sin base.

J.D. Vance, vise presidente norteamerikano, i Mike Johnson, presidente republikano di Kámara di Representantenan, a papia ku e manifestantenan.

Den e desfile a mira miembronan dje grupo supremasista blanku norteamerikano i neonazi “Patriot Front”, kargando bandera i imágennan religioso.

E organisadónan dje marcha a bisa ku nan meta no ta solamente pa kambia leinan federal i estatal, “sino tambe kambia e kultura pa, den último instansia, hasi ku aborto ta bira algu riba kua hende ni sikiera hende ta pensa”.

For di yüni di 2022 hopi estado konservador a prohibí òf limitá aborto. Kasi un di kada muhé norteamerikano entre 18 i 44 aña ta biba den un dje estadonan ei.
Míles di muhé norteamerikano ta haña nan mes obligá di kambia di estado pa por abortá.

LAGA UN KOMENTARIO

Please enter your comment!
Please enter your name here