SIUDAT DI MEXICO, AP.- Míles di sentroamerikano ku ta soña di yega Merka, a lanta ku donashon di fruta i kòfi djamars, den un stadion deportivo den kapital di México. Presidente Donald Trump a kombertí e karavana di migrante den un tema sentral den elekshon di medio periodo na Merka.
Outoridat a kontra mas di 2.000 migrante den stadion di Jesus Martinez djaluna anochi, pero e yegada di biaheronan no a para.
E stadion tin kapasidat di akohé 6.000 persona.
E muhé i muchanan a drumi separá di e hòmbernan. E migrantenan a drumi riba kolchonnan fini den e stadion.
Nashieli Ramirez, di Komishon di Derechi Humano di e kapital, a bisa ku e siudat ta prepará pa risibí 5.000 biahero ku por keda den e stadion segun e kantidat di tempu ku nan mester. E karavana prinsipal tin mas o ménos 4.000 integrante, pero algun grupo mas chikí ta avansando pa sùit di e teritorio mehikano.
Djamars e migrantenan lo deskansá i haña konseho legal tokante e rekisitonan pa pidi refugio den México òf asilo den Merka, segun Alex Mensing, un di e aktivistanan ku ta kompaña e migrantenan.
