QUITO, AP.- Míles di venezolano tabata na frontera purbando di drenta Perú djamars. Awe ta e fecha límite ku presidente Martin Vizcarra a establesé pa otorgá pèrmit pa residensia temporal.
E mandatario a señalá djaluna ku Perú a akohé kasi mitar mion venezolano. Pero mester hasi un evaluashon di e situashon debí ku mester buska un “ekilibrio entre e solidaridat i posibilidat real di duna yudansa na nan i nos kompatriotanan”.
El a presisá ku lo duna residensia na venezolanonan ku hasi un petishon te 31 di desèmber. Pero e venezolanonan mester drenta e pais promé ku 31 di òktober paso Perú ta na su límite di kapasidat di akohé mas inmigrante. Pues lo stòp di otorgá e pèrmitnan aki.
Segun sifranan di Nashon Uní, 2,3 mion venezolano a sali di su pais meimei di un skarsedat severo di kuminda i un krísis ekonómiko afektá pa hiperinflashon.
