WUHAN, CHINA, AFP.- Míles di persona a aglomerá na stashonnan di trein di Wuhan despues ku outoridat a retirá e prohibishon pa bandoná e siudat, kual tabata episentro di e coronavírus nobo.
Outoridat a terminá e lockdown, imponé mas di dos luna pasa, ku a impedí abitantenan di bandoná e siudat.
Gobièrnu ta premirá ku 55.000 lo bandoná e siudat awe, kual a imponé e lockdown riba 23 di yanüari.
E agensia estatal Xinhua a bisa ku vários bus a sali for di e siudat pa retirá barera i buelonan tambe a reanudá na aeropuerto internashonal di Wuhan.
E coronavírus, COVID-19, a kombertí Wuhan den e promé siudat na mundu ku a introdusí un lockdown kual a sigui afektá kasi mitar di e poblashon mundial. E medidanan di Wuhan a amplia pa Hubei, serando míles den nan kas.
E coronavírus nobo a aparesé na fin di 2019. Mayoria di e kasonan aki tabata vinkulá ku un merkado di marisko ku tabata bende animalnan salbahe. Djamars ta promé biaha den vários luna ku China a informá ku no tabatin ningun morto relashoná ku COVID-19.
