AN ANTONIO DEL TACHIRA, VENEZUELA, AP.- Karavana di famianan venezolano a manehá durante vários ora riba rutanan infestá ku bandidu, pa krusa frontera di Colombia pa buska kuminda i medisina skars den kas. Pa e segundo fin di siman konsekutivo e gobièrnu sosialista di Venezuela a habri frontera ku Colombia, sera desde hopi tempu kaba. 6’or di mainta tabatin un rei di kumpradó den e pueblo di San Antonio del Tachira. Algun a yega den bùs desde siudatnan ku 8 ora leu di distansia.
E gobièrnu na Caracas a sera tur paso, un aña pasá pa kombatí kontrabanda na frontera. E gobièrnu a sostené ku algun tabata kousa skarsedat dor di kumpra kuminda i gasolin na preis abou na Venezuela i bende esaki na un preis muchu mas haltu na Colombia. Sinembargo, skarsedat ta sigui krese na Venezuela, ku inflashon di tres digito, kontròlnan monetario ku ta limitá importashon i invershon i un bahada den preis di petroli. Meimei di un presensia militar fuerte, tur hende a mantené òrdu i tabata mustra hopi tenso. Algu aktivista tabata parti pamflèt kontra gobièrnu, buskando pa lanta frustrashon mas haltu ainda, debí na reinan largu den supermerkado den último simannan.
Algun tabata protestá i kanta bandera pero mayoria no tabatin interes pa enfrentá i tabata mas entusiasmá pa e perspektivanan di haña supermerkadonan yen i e oportunidat pa kue kosnan luhoso manera serbes òf rushi di uña.
Funshonarionan kolombiano tabata risibí e venezolanonan individualmente, polis tabata ofresé bolo i algun otro tabata toka vallenato.
“E kos aki ta masha tristu mes, pero nos sa ku einan si nos ta haña algu”, asina un maestra di 70 aña a bisa. E tabata kompañá pa su nietu di 5 luna.
35.000 venezolano a krusa frontera e promé dia kual Colombia a yama un “koredor humanitario”.
