BAGDAD, AP.- Forsanan paramilitar irakí respaldá pa Iran a bisa ku un serie di atake kontra algun base di su milisianan a wòrdu efektuá pa dronenan di Israel, i a agregá ku Merka ta responsabel pa esaki. E milisianan a primintí ku nan lo defendé kontra di kualkier atake den futuro.
Forsa di Mobilisashon Popular a presentá su deklarashon despues di por lo ménos tres eksploshon misterioso na algun base di FMP na Irak den. Un investigashon di gobièrnu, a determiná ku un di e eksploshonnan kual a sosodé serka di Baghdad, a wòrdu kousá pa un atake ku drone.
Funshonarionan merikano a ninga Merka su partisipashon den e eksploshonnan aki.
Tin spekulashon kresiente ku Israel ta atakando Irak. Promé minister israelí Benjamin Netanyahu a ninga di konfirmá e operashonnan aki.
Si Israel a efektuá e bombardeonan, esaki ta nifiká un ampliashon den e pais su ‘kampaña’ kontra e influensia kresiente di Iran den e region. Israel ta konosí pa su atakenan kontra iranínan na Siria, inkluyendo Líbano i Sudan den pasado.
