Comandos de la Frontera (foto) ta e grupo armá formá pa èks-miembronan dje grupo gueria kolombiano FARC.
LIMA, Perú (AFP).- Militarnan i polisnan di Perú a enfrentá miembronan dje grupo armá Comandos de la Frontera, formá pa disidentenan dje gueria kolombiano di FARC. E enfrentamentu a tuma lugá den un zona na frontera, den e pueblo chikitu di Putumayo.
E enfrentamentu, di kua no a duna fecha, “a obligá e kriminalnan pa hui”, segun e komunikado di Ministerio di Defensa. Tres di nan a kai den e riu Yaricaya. Segun outoridatnan, e kondishonnan di seguridat komo tambe e profundidat dje riu a hasi imposibel pa por a buska e kurpanan.
Comandos de la Frontera ta un dje gruponan disidente di e èks-grupo di gueria marxista FARC, ku a stòp di eksistí meimei di dékada pasá na momentu ku nan a entregá nan armanan na gobièrnu kolombiano i a firma un akuerdo di pas.
Djabièrnè último e presidente nobo di Colombia, Abelardo de la Espriella, a ekstraditá pa Merka e hòmber Geovany Andre Rojas, hefe di Comandos de la Frontera i kende a keda kapturá.
Entre 21 i 25 di sèptèmber, Forsanan Armá di Perú i Colombia a reuní na Lima pa firma akuerdonan di seguridat i kooperashon na frontera.
