Diplomátikonan di vários pais ta buska pa skonde despues ku militarnan israelí a los vários tiru na momento ku nan a bishitá e siudat di Jenin, den Cisjordania di kua un parti ta okupá pa ehérsito israelí.
CISJORDANIA (AFP).- Ehérsito israelí a rekonosé ayera di a los tirunan “di atvertensia” durante di un bishita di diplomátikonan estranhero organisá pa e Outoridat Palestino den e parti di Cisjordania okupá, provokando un amplio kondena internashonal.
Outoridat Palestina, ku parsialmente ta atministrá Cisjordania, a akusá e forsanan israelí di a tira “di forma dirèkt i ku munishon real kontra un delegashon diplomátiko akreditá” serka di Yenin.
Ehérsito israelí a hustifiká e insidente pa e hecho ku e diplomátikonan “a desviá for di e itinerari aprobá pa hasi e bishita”.
“Sòldánan israelí ku ta operá den e zona a lòs tirunan di atvertensia pa kore ku nan”, el a agregá, promé di a lamentá “molèster ku a keda kousá”.
Bosero di Antonio Guterres, sekretario general di Nashonnan Uní, a kalifiká e insidente komo “inaseptabel”. “Ta bon kla ku diplomátiko ku ta hasi nan trabou nunka mester ta víktima di tiramentu, tampoko ataká di ningun manera”, segun e bosero, Stéphane Dujarric.
E hefe di diplomasia europeo, Kaja Kallas, a bisa ku “kualke menasa kontra bida di diplomátikonan ta inaseptabel”.
Italia, Fransia, Portugal, Alemania i Bélgika a konvoká e respektivo embahadornan di Israel òf a bisa di lo papia di forma dirèkt riba e insidente.
México lo pidi embahada di Israel “aklarashon” riba e tirunan durante di bishita di dos diplomátiko mehikano, miéntras ku Uruguay tambe lo hasi esei teniendo kuenta ku su embahador tabata den e delegashon na Yenin.
