WILLEMSTAD. – Ayera durante Reunion di Komishon Sentral den Parlamento, kaminda ku parlamentarionan a deliberá ku Minister di Salubridat, Medio Ambiente i Naturalesa enkuanto pasonan tumá dor di e ministerio di Salubridat, Medio Ambiente i Naturalesa den kuadro di prevenshon i protekshon relashoná ku e Coronavirus, Minister Suzanne ‘Suzy’ Camelia-Römer a splika ku awor aki no tin tempu pa pániko ni tampoko aktua a base di rumornan, Ta tempu pa traha ku echo.
Durante su introdukshon Minister Camelia-Römer a trese un sitashon di e Direktor General di ‘World Health Organization’ (WHO), relashoná ku e pániko ku e vírus Corona a trese kuné rònt mundu.
E sitashon di e Direktor general di WHO: ‘Mi ta deklará un emergensia di salú públiko di preokupashon internashonal basá riba e viro 2019NEOV, no pasobra loke ta pasando na China, pero pasó loke ta pasando na otro paisnan. E deklarashon aki no ta un boto di falta di konfidensia den China, al kontrario e organisashon di salú mundial tin kontinuamente konfidensia den e kapasidat di China pa kontrolá e “outbreak”. Nos preokupashon prinsipal ta pa e vírus bai paisnan ku sistemanan di salú públiko suak, pues e preokupashon ta pa paisnan ku sistemanan di salú públiko suak i no ta prepará pa atendé ku e viro. Nos mester aktua pa yuda e paisnan ku ta suak ku e problema aki. Esaki ta e tempu pa echo i no tempu pa miedu, esaki ta tempu di siensia i no rumor, esaki ta tempu pa solidaridat i no stigmatisashon.’
Despues di a pasa den e sitashon di Direktor General di WHO, Minister Camelia-Römer a splika kon e sistema di salubridat aki na Kòrsou ta funshoná.
Minister a splika ku aki na Kòrsou tin un sistema di divishon di tarea ku den sirkunstansianan ku ta trata salú públiko un gobernante responsabel mester sòru pa protehá e pueblo i tuma medidanan ku ta protehá e salú di pueblo i pa sòru ku ta prevení mas tantu posibel pa e viro no plama.
Esaki e minister a trese dilanti, pa motibu ku ta imposibel den e mundu plat aki kaminda ku hopi hende ta bai bin i pa un viro manera esaki no kana i yega poko poko rònt mundu.
Minister Camelia-Römer a splika ku atraves di e diferente organisashonnan mundial i tambe di region riba e tereno di salú, e tin tin kontakto ku tur ministernan di den área i tambe tur organisashon i ministernan di den Reino Ulandes. Kontaktonan ta tuma lugá via mail, WhatsApp group i tur otro formanan di komunikashon. Esaki ta sosodé den un forma konstante, e minister a bisa sigur ku tur profeshonalnan den e mundu di salubridat.
Pues di e forma aki Minister kontinuamente tin tur tipo di informashon relashoná ku e desaroyo di e viro aki.
Ounke ku e viro no a yega aki, minister a traha su “landsbesluitnan” pa si ora e viro yega aki, ya esakinan ta kla.
Minister a enfatisá ku Kòrsou a kuminsá operá promé ku WHO a deklará e viro aki komo un menasa serio pa mundu.
