WILLEMSTAD.- Durante di e bishita resien di e Delegashon di College Financieel Toezicht (C) na Kòrsou, a pidi pa papia ku Minister Cijntje tokante desaroyo ekonómiko, Damen i agènda di invershon di Kòrsou. Un delegashon grandi liderá pa e presidente, señora Lidewijde Ongering, i demas miembronan di e kolegio, inkluso Sr. Gregory Damon ku ta miembro na nòmber di Gobièrnu di Kòrsou, a partisipá na e reunion akí. E delegashon kier a sa kon Minister Cijntje i su Ministerio ta bai krese ekonomia di un forma duradero.
Minister Cijntje a duna di konosé ku e fórmula pa stimulá ekonomia pa por krese di un forma rápido ta si nos tin sufisiente kapasidat humano i fondo supstansial pa por ‘jumpstart’ ekonomia. Minister Cijntje a mustra e kolegio bon kla ku sin hende i sin sèn nos no por logra lihé i ku e miembronan di kolegio sa esei masha bon. Mas aleu Minister a ilustrá ku dor ku Kòrsou su ekonomia ta diversifiká, esaki ta pone ku kresementu ta bai mas slo kompará ku Aruba òf St.Maarten ku tin un ekonomia basá riba turismo so. Asina mes, Minister Cijntje a duna di konosé ku turismo a pone nos ekonomia krese mas lihé, yegando e nivel pre-covid for di 2022 na lugá di 2024 manera IMF a pronostiká.
Pues, sin ayudo finansiero di Hulanda pa desaroyá ekonomia, Minister Cijntje a logra ku ekonomia a krese den e último 2 añanan dor di esfuerso grandi atrayendo mas aerolínea nobo i/òf oumentando frekuensia di buelonan eksistente. Di un forma kontundente Minister Cijntje a enfatisá ku si nos no haña espasio i yudansa real di Hulanda nos lo no por logra kresementu ekonómiko muchu mas haltu, pero tambe pèrkurá pa un ekonomia resiliente i mas diversifiká.
Minister Cijntje a ilustrá e gran potensial ekonómiko ku tin aki na Kòrsou, i kuantu programa i proyekto tin den tapara ku por hasi nos ekonomia sólido, duradero i diversifiká. Pero si no por fia sèn, oumentá e presupuesto di MEO pa por stimulá ekonomia di tal manera ku esaki lo generá divisa, i oumentá kupo di trabou di un manera duradero i diversifiká, nos a keda mesun leu.
Mas aleu lo mester invertí den drecha enseñansa i infrastruktura, sino no por mantené e nivel di kresementu i prosperidat.
E kolegio finansiero di su banda a indiká ku invershonnan públiko ta na un nivel muchu abou kompará ku region i ku Gobièrnu no ta invertí tur sèn ku ta presupuestá pa invershon.
Minister Cijntje a indiká ku den e trayekto ku a inisiá ku IMF lo dediká tempu na e proseso pa ministerionan por invertí fondo públiko i lo pone atenshon riba e siklo di invershon públiko. De paso Gobièrnu a kuminsá traha un plan di invershon konkreto ku a keda entregá pa finansiamentu. Minister Cijntje a indiká ku su programa di invershon ta konsistí di produkshon di energia duradero usando Hidrógeno, stimulashon di IT i sektor marítimo ku ta forma parti di e strategia nashonal di eksportashon.
Mas aleu e kolegio finansiero a duna di konosé ku e kompania Hulandes, e astiero Damen, a indiká ku su pèrmitnan di trabou ta tuma tempu pa ser prosesá. Minister Cijntje a indiká ku na promé lugá Damen no ta kumpliendo ku tur loke a primintí. Banda di esaki Minister Cijntje a indiká ku mester puntra otro sektor i ministerionan pa haña un bista real di e situashon en bes di papia solamente ku Damen. Tambe Minister Cijntje a indiká na e Kolegio ku tin un prosedura rápido pa kompanianan manera Damen i Aqualectra pa loke ta trata trahadó estranhero.
Pa loke ta e sektor di Energia duradero Minister Cijntje ta urgi Gobièrnu Hulandes pa formalisá un komishon ku ta konsistí di ámtenarnan di EZK i BZK di Hulanda pa atendé ku e trayekto di energia renobabel. Miéntras ku Kòrsou tin su komishon i ta dal pasonan signifikante pa materialisá e trayekto piloto ku lo sòru pa produkshon di 72 MW di kual lo abastesé Aqualectra ku 15 MW. Kompanianan Hulandes ta interesá den kombustibel ku lo keda produsí ku uso di energia duradero manera entre otro Jet Fuel pa KLM.
Minister Cijntje a mustra riba Kòrsou su determinashon pa loke ta trata energia duradero dor di a finansiá e estudio di fondo di nos laman, resientemente hasí dor di e kompania hulandes Fugro.
