Presidente di Costa Rica, Laura Fernandez na momentu ku el a introdusí e minister di Asuntunan Eksterior Manuel Tovar
SAN JOSE, COSTA RICA, AFP.- Presidente di Costa Rica, Laura Fernandez, a retirá su minister di Asuntunan Eksterior djaweps. Esaki a pasa despues ku el a partisipá na un reunion tokante seguridat di Latinoamérika sin pone e presidente na altura.
Fernandez a bisa ku ku e ta esun ku mester a partisipá na e reunion di e aliansa anti kartel di Trump, “Shield of the Americas”, na New York. E echo ku minister Manuel Tovar, no a konsult’é a kousa “gran daño stratégiko”.
E reunion a tuma lugá djamars.
Segun gobièrnu di Costa Rica, Tovar a partisipá na e reunion “sin informá” presidente tokante su partisipashon. Fernandez ta un aliado konservadó di Trump.
“Shield of the Americas” ta un koalishon di gobièrnunan pro Merka, pa kombatí tráfiko di droga i krímen organisá den henter e region.
Durante e reunion di djamars, 15 miembro di e koalishon a publiká un deklarashon konhunto, den kua nan a ekspresá nan intenshon di kongelá aktivo, imponé restrikshonnan di visa entre otro pa miembronan i sostenedó di 24 organisashon kriminal.
Durante e reunion, Trump a referí na e kartelnan di droga komo “e ISIS di Hemisferio Oksidental”.
Costa Rica, un destinashon turístiko ku pa hopi tempu a ser konsiderá un ehèmpel di stabilidat na Latinoamérika, ta enfrentando un oumento di violensia relashoná ku droga.
Tovar no a duna komentario riba su retiro i simplemente a gradisí Fernandez, kende ta na poder for di mei último.
