Luigi Mangione (C), akusá di a mata e CEO di un kompania di seguro. Gobièrnu di Trump ta haña ku e mester keda kondená na pena kapital.
NEW YORK (AFP).- E sekretaria di hustisia di Merka, Pamela Bondi, a anunsiá di lo buska kastigu di morto pa Luigi Mangione, e aparente asesino di presidente di un kompania di seguro médiko den desèmber último na New York.
“Despues di un konsiderashon kuidadoso, m’a ordená fiskalnan federal pa nan buska pena di morto den e kaso aki”, segun Bondi a bisa den un komunikado.
Brian Thompson, presidente di United Healthcare, un dje kompanianan di seguro médiko mas grandi di Merka, a keda asesiná dia 4 di desèmber den un kaya di New York na momentu ku e tabata dirigí su mes na un konferensia dje empresa.
Segun Bondi, “e asesinato tabata un akto di violensia polítiko, ku tabata premeditá i ku sanger friu”.
E krímen i e huida di sinku dia dje supuesto outor tabatin merikanonan preokupá, e mayoria hopi krítiko ku seguro privá di salú pa e kostonan haltu i tardansa pa duna akseso na servisionan médiko.
Mangione, un ingeniero di 27 aña i bon bon famia, a keda detené den un restorant di McDonald’s den Altoona, un siudat chikí dje estado di Pennsylvania.
El a deklará su mes inosente di 11 akusashon den tribunal di Manhattan, entre nan asesinato komo akto terorista.
Tambe el a keda akusá pa un tribunal federal di asesinato i poseshon di arma, e último akusashon aki imponé na Pennsylvania tambe.
Abogado di Mangione, Karen Friedman Agnifilo, a bisa ku “e desishon pa ehekutá” e detenido ta “polítika i esei ta bai kontra di rekomendashon di fiskalnan federal lokal i kontra di lei”.
Ounke den estado di New York kastigu di morto a keda abolí, e akusashonnan ku e sospechoso ta enfrentá na nivel federal por habri kaminda pa kastigu di morto.
Pero finalmente ta e hurado popular ku lo husg’e mester determiná si e ta kulpabel i si e mester kondená na kastigu di morto.
