WILLEMSTAD.- ‘Mi ta un bon boneriano, buriku no ta bati su pia dos biaha na e mesun piedra. Nunka bo no ta grandi pa siña i ami ta haña lès tur dia di tur hende i ta pará habrí pa siña’, tabata palabranan ayera di Minister di Salubridat Públiko sra. Dorothy Pietersz-Janga  durante su kontestanan ayera den Parlamento. Manera ta konosí, despues ku karta ku Minister Janga a manda pa likidadónan di SBZV, a lèk den komunidat a surgi konmoshon den komunidat, pa e instrukshon ku ta duna.

Minister a splika dikon el a saka e karta, ta pa para e prosedura andando den korte, pa skapa komunidat plaka. Pa motibu ku dia el a asumí responsabilidat, komo Minister di GMN, el a shòk di tuma nota kuantu kaso tin den korte kontra di Gobièrnu pa loke ta trata e ministerio di salubridat.  Kasonan ku ta kostando kaha di gobièrnu hopi plaka. Esei tabata motibu, Minister a splika ku e tabata hanshá pa saka e karta.

Pues niun momentu no tabata su intenshon pa e trapa trias polítika o sea ku a propósito e no a respetá esaki. E Minister a splika ku su punto di salida tabata pa wanta e kaso i buska un otro solushon ku lo no kosta kaha di Gobièrnu plaka.

Despues di a tuma nota di e reakshonnan di tur ángulo i asta di su mes partido i partner den koalishon, el a realisá ku tin algu ku a bai hopi robes.

Ayera e Minister a splika ku esaki ta falta di sabiduria hurídiko, e no a realisá su mes bon kiko tin skibí den e karta. Pero e ta Minister i e ta karga e responsabilidat i no ta importante tampoko ken a skibi e karta.

Minister a splika tambe ku e no a asumí posishon pa no yena su saku ni saku di niun konosí.

Minister Janga a splika ku el a siña di su fayo awor i pa semper e lo no faya mas. E loke ku a pasa ta ku e no tabata na altura di a intervení den trias polítika i ku e karta ku el a manda tabatin un embergadura di e índole konosí.

Finalmente e minister  a bisa ku el a firma e karta i e ta karga e responsabilidat i e no a bira minister pa e yuda ningun bon amigu.

El a siña, e Minister ta bisa i e ta sigur di su kapasidat  pa sigui e trabou ku e ta hasiendo ku èkstra atenshon despues di e fayo aki.

LAGA UN KOMENTARIO

Please enter your comment!
Please enter your name here