ORANJESTAD – Na 2026 lo tin un otro suma adicional pa nos pensionadonan. Asina prome minister Mike Eman a bisa recientemente, despues di firmamento di aumento salarial pa e maestronan di scol. Ta reuniendo cu SVb pa por yega na stipula un suma adicional di aumento pa aov’ers na 2026. Mehoracion di poder di compra ta central pa Gobierno AVP-Futuro, Eman ta expresa. Pesey lo continua trahando pa fortalece e poder di compra di nos grandinan. Desde April 2025 pensionadonan a haya structuralmente tur fin di luna e aumento di 250 florin den nan repartietoeslag. E no ta e 750 florin ainda total cu a priminti si durante campaña electoral na 2024.
Minister-President Eman ta mustra su gratitud pa e hopi reaccion positivo cu a yega for di comunidad di nos pensionadonan. Eman ta bisa cu a base di un rapport di Economisch Bureau Amsterdam (Koopkracht Plan Aruba), cu gobierno a laga traha, tin un plan integral di gobierno pa bai mehora poder di compra mas ainda.
“Nos grandinan a duna tur nan bida pa yuda Aruba para fuerte riba pia. Nos deber como pueblo y como gobierno ta pa trata nan cu dignidad, husto y cu hopi cariño. E aumento di 2025 tabata un prome paso den recuperacion di e poder di compra cu nan a perde durante e ocho aña cu a pasa, awor ta sigui un yudansa adicional na 2026”.
MAS SOSTEN PA PENSIONADO; REDUCCION DI DEN PRIMA DI AZV
Minister-President Eman a indica cu hunto cu Minister drs. Mervin Wyatt Ras ta haciendo e ejercisio cu AZV y SVB tambe pa busca manera pa rebaha e prima di 5% cu pensionado mester paga na totalidad, dor cu nan no tin dunador di trabao pa contribui. Pa hopi di nan, e carga financiero aki ta hopi pisa. Minister President Eman ta bisa cu pesey gobierno ta trahando pa yega na reduci substancialmente e prima aki pa pensionadonan te cu un ingreso anual di bou di 30.000 florin. “Un sociedad husto no ta midi progreso solamente na cifra economico, pero na manera cu e ta trata su grandinan. Nan merece paz, respet y stabilidad financiero,” asina Minister-President Eman a conclui.(NoticiaCla)
