75.5 mion yudansa di likides ta kologá na un hilu
WILLEMSTAD.-Gobièrnu di Kòrsou a haña mas tempu pa kaba di kumpli ku eksigensianan ku Ulanda a pone pa asina Kòrsou por haña e siguiente tranche di plaka den kuadro di yudansa di likides. Esei minister di finansa mr. drs. Javier Silvania a duna di konosé un ratu pasá. Den promé instante Ulanda a duna Kòrsou espasio te 18 di yüni pa kumpli pero entretantu e gabinete Pisas a logra trese kambio den esei. Den e akuerdo nobo gobièrnu tin te otro siman 1 yüli pa kumpli.
Minister Silvania a duna di konosé ku asta promé ku e gabinete aki huramentá ya kaba nan tabata na mesa ku outoridatnan ulandes, hustamente konsiente di e urgensia pa atendé e falta di likides di Kòrsou. E kumplimentu ku palabrashonnan ku Ulanda ta enserá ku Parlamento mester pasa leinan manera esun ku ta kòrta salario di minister, parlamentario i trahadónan den fundashon i otro institutonan di gobièrnu. Tin instansianan ku ya kaba, antisipando riba e lei, a kuminsá implementá redukshon di salario pero tin otronan ku no a hasié ainda. Tin un investigashon kanando den kua lo hasi e evaluashon entre otro ku islanan BES pa wak kon e nivelnan ta den instansianan di gobièrnu. Minister di finansa ta urgi parlamentarionan pa pasa e leinan konserní.
Di otro banda konseho di minister tambe mester ratifiká palabrashonnan ku Ulanda. Meskos ta konta pa Parlamento di Kòrsou ku mester ratifiká palabrashonnan hasi ku Ulanda i informa gobièrnu ulandes di esakinan.
Minister Silvania ke urgi parlamentario pa pasa un moshon den kua nan ta ratifiká palabrashonnan hasi aña pasa. Esei ta kondishon pa haña e siguiente tranche di 75.5 mion. Si no kumpli Ulanda lo no manda e yudansa finansiero. Mas detaye den edishon di EXTRA.
