Reunion a sigui pero
WILLEMSTAD.- Despues ku reunionnan di GOA dia 23 di desèmber 2024, 16 i 30 di yanüari 2025, a keda posponé pa minister di Maneho di Gobernashon, Planifikashon i Servisio Públiko, Shalten Hato, e reunion di e plataforma di konsulta entre gobièrnu i sindikatonan di djaweps 6 di febrüari a sigui. E reunion a tuma lugá sinembargo sin presensia di minister Hato.
Hato a laga hefe interino di SSO (“Shared Service Organisatie”) i Sekretario General interino na Ministerio di BPD, Maharo Isenia presentá. E resultado di e reunion, segun sindikatonan tabata ku no a haña informashon ku a spera.
Tin vários punto riba agènda ku sindikatonan ta pendiente un kontesta di gobièrnu riba nan. Presidente di sindikato SAP, Amado Vilchez den komentario pa EXTRA ta bisa ku e representante di gobièrnu no por a duna splikashon riba kontenido di e puntonan pendiente pa haña aklarashon riba dje.
Un di e tópikonan ku ta pendiente di risibí kontesta riba dje ta pa inkluí den lei un gratifikashon pa ámtenarnan ku kumpli 45 aña den servisio. Vilchez ta splika ku ta for di 2016 gobièrnu a tuma desishon pa subi edat di penshun di 60 pa 65 aña. “A subi edat di penshun pero no a para ketu na e echo ku esaki ta enserá ku hendenan ta traha tambe mas largu den gobièrnu i pa duna un gratifikashon tambe ora kumpli 45 aña den servisio.”
E lei aktual ta papia di un gratifikashon te na 40 aña den servisio. Segun Vilchez mester adaptá e lei ku forsa retroaktivo pasobra entretantu tin ámtenar ku a baha ku penshun i ku a kumpli 45 aña den servisio sin ku a haña un gratifikashon pa esaki. ‘Pues mester traha espasio finansiero riba presupuesto pa esaki.”
Otro tópikonan riba agènda ta kambionan den lei di penshun, realisashon di e organisashon nobo di servisio di impuesto (‘Nieuwe Belastingdienst’), proseso di solisitut den kuerpo polisial i punto di bista di gobièrnu pa trese uniformidat den kompensashon ku ta paga na personal den kadena hudisial den kaso di aksidente bou di ora di trabou.
Mirando ku no tabatin informashon ku Isenia por a duna e sindikatonan a proponé pa den e siguiente reunion di GOA gobièrnu duna informashon riba e kambionan den lei di penshun. Ta bai pa 2 kambio. E promé ta pa separá indeksashon di salario di ámtenar for di indeksashon di penshun.
E di dos kambio den lei ta pa hasi reparashon pa ámtenarnan ku ta baha ku penshun promé ku 65 aña kaminda ta kòrta ku 6 porshento den nan penshun kaba aña. Esaki den sierto kaso a lidia na un situashon ku a kòrta asina tantu den e penshun ku el a asta afektá loke e ámtenar e akumulá na derecho di penshun den e añanan ku el a traha. Segun Vilchez e kantidat di ámtenarnan ku ta haña nan den e situashon aki ta sigui krese i ku mester trese kambio den esaki.
E sindikatonan a proponé pa den un próksimo reunion gobièrnu duna informashon riba e kambionan den lei di penshun. Esaki a lanta un diskushon riba ki fecha esaki mester ta, mirando ku dia 20 di febrüari tin e reunion regular di GOA planiá. Segun gobièrnu tin muchu reunion di GOA tras di otro.
Vilchez den un komentario a bisa ku e echo ku reunionnan ta tuma lugá tras di otro ta debí ku e minister kada bes ta kanselá reunion i dado momentu e kos ta bai pega.
