JERUZALEM (AFP).- Negoshadónan israelí “nunka tabata asina serka di un akuerdo” pa liberashon di rehennan den Gaza for di despues dje tregua di novèmber di aña 2023 den e guera entre Israel i Hamas, segun e minister di defensa israelí, Israel Katz.
“Nunka nos tabata asina serka di un akuerdo relashoná ku e rehennan”, segun e minister, dilanti di miembronan di Komison di Relashonnan Eksterior di Parlamento israelí, segun bosero dje entidat, ku a konfirmá e deklarashonnan di Katz den un seshon tras di portanan será i sitá pa prensa israelí.
“Pa loke ta trata e posibilidatnan pa yega na un akuerdo di interkambio di prezu i stòp ku e guera entre e okupashon (Israel) i e resistensia (Hamas i otro gruponan palestino) mi ta kere ku sigur nos ta mas serka dje meta ku nunka promé”, segun un fuente di Hamas a bisa bou di anonimato.
Pero esaki “si Netanyahu (e promé minister israelí) no laga kos frakasá intenshonalmente manera el a hasi kada bes”, el a agregá.
Den novèmber di aña 2023, despues di un periodo di pas di un siman, e úniko ku a tuma lugá for di 7 di òktober di aña 2023, e periodo di pas a fasilitá liberashon di 105 rehen prezu den Gaza i di 240 palestino prezu for di prizònnan israelí.
Tur e esfuersonan di mediashon, e tempu ei na enkargo di Egipto, Merka i Qatar pa yega na un pas duradero. a frakasá.
Den luna di novèmber, Qatar a anunsiá di ta suspendé su esfuersonan i a akusá ámbos parti di falta di boluntat pa logra un akuerdo.
Pero pa un siman kaba e esfuersonan diplomátiko a keda reanudá, dirtí kada bes pa Merka, Egipto, Qatar i Turkia.
