WILLEMSTAD.- Ayera huntu ku Inspekshon Ekonómiko, Minister Middelhof a bishitá diferente playa públiko den kuadro di e maneho nobo pa “standplaats” riba playanan públiko.
E bishita a kuminsá na Playa Daaibooi, un sitio kaminda, manera ta konosí, den pasado tabatin diferente kaso hurídiko relashoná ku uso i aktividatnan riba e playa. Tambe a bishitá Playa Kenepa Chikí, kaminda a papia direktamente ku e personanan ku tin “standplaats” aktualmente na e sitio.
Minister Middelhof lo sigui traha pa restablesé e balansa: espasio pa hasi negoshi, pero tambe espasio pa pueblo disfrutá libremente di loke ta di nos tur.
“Nos playanan ta parti di nos patrimonio, nos identidat i nos bida komo pueblo. Òrdu. Akseso. Responsabilidat”, minister Middelhof a duna di konosé.
