WASHINGTON – Merka tin un plan den etapa (‘stappenplan’) pa Venezuela. Asina minister di Relashonnan Eksterior Marco Rubio a bisa awe. E ta ninga ku Merka awor ta ‘improvisá’ ku e situashon. Segun Rubio meta prinsipal di Merka ta pa evitá ku Venezuela ta drenta den un situashon kaótiko.
Pa evitá esaki Estado Unídos ke yega na e situashon ku Venezuela ta trankil atrobe. “Despues nos lo drenta un fase nobo di rekuperashon.” Pa yega na esaki Venezuela mester habri su merkado pa kompanianan di Merka. Tambe e ke kuminsá ku un proseso di rekonsiliashon. Miembronan di oposishon ku awor ta será den prisòn tin ku haña grasia pa nan por yuda rekonstruí e pais, segun Rubio.
E último fase di e plan den etapa lo ta introdukshon di un fase di transishon. Pero Rubio te ainda no a duna detaye tokante esaki. Segun Rubio Merka i Venezuela awor ta deliberá tokante implementashon di e plan den etapa.
