E potrèt di Agensia Kubano di Notisia ta mustra e mandatario ruso Vladimir Koloktsev (d) durante di un akto ofisial ayera na La Habana.
LA HABANA, Cuba (AFP).- E minister di Interior ruso, Vladimir Kolokoltsev, ta na Cuba pa sostené “reunionnan bilateral” , segun a keda anunsiá pa embahada di Rusia, na un momento ku e presidente merikano Donald Trump a oumentá preshon riba e isla. Trump e luna’ki a hasi un yamada riba La Habana pa “yega na un akuerdo”, di kua e no a bisa e naturalesa, òf paga un preis similar na esun di Venezuela, di kua presidente Nicolas Maduro a keda deroká pa Merka despues di un bombardeo dia 3 di yanüari.
Venezuela tabata un aliado klave di Cuba i tabata kontribuí na e pais ku petrolio i plaka, loke ku Trump a primintí na para. E minister ruso a keda risibí na aeropuerto dje kapital kubano pa e mandatario Lazaro Alberto Alvarez.
E embahador ruso na La Habana, Victor Koroneli, a agregá ku Kolokoltsev a yega djaluna anochi “pa fortalesé e koperashon bilateral i e lucha kontra di delinkuensia”. Den un deklarashon na e kanal estatal Rossiya-1 na e aeropuerto di La Habana, e minister Kolokoltev a referí na e posishon di Mòsku riba e atake di forsanan norteamerikano na Caracas, ku a kulminá ku kaptura di Nicolas Maduro.
“Na Rusia nos ta konsiderá esaki komo un akto di agreshon armá sin hustifikashon kontra di Venezuela”, el a deklará.
E bishita aki ta tuma lugá na un momento ku Trump a dòbel su menasa kontra di Cuba despues dje operashon militar na Caracas. Den e akshon ei no ménos ku 32 militar kubano, algun di nan dje ekipo di seguridat di Maduro, a pèrdè nan bida.
Rusia i Cuba a reforsá nan relashon for di despues ku Mòsku alkansá su ofensiva kontra di Ukrania den 2022.
