Kontrali ku pago di indeksashon na aña 2023

WILLEMSTAD.- Te awe gruponan di ámtenar i èks ámtenar tin problema ku pagonan ku nan tin derechi riba dje i korekshon di nan salario. Sindikato ABVO ta lamentá inmensamente ku e biaha akí kosnan a kana asina miéntras ku na aña 2023 si kosnan a kana hopi bon. Asina miembro di direktiva di ABVO, Raymond Margaritha ta deklará pa EXTRA.

Margaritha ta mustra ku na aña 2023 gobièrnu a kuminsá paga indeksashon di salario ku forsa retroaktivo te ku aña 2019 i ku kosnan a kana nèchi sin muchu fayo kometé. “E tempu ei a duna sindikatonan informashon regular i splikashon detayá kon e kalkulashonnan ta tuma lugá.” Sinembargo na ougùstùs di aña 2024 a bini kambio den konstelashon di gobièrnu i ministernan a haña kartera dòbel manera ta e kaso ku minister di Hustisia Shalten Hato ku a bira alabes minister di Maneho di Gobernashon, Planifikashon i Servisio Públiko (BPD).

Margaritha ta enfatisá ku pa sindikatonan e ministerio ta hopi importante. “E no ta un ministerio ku ta hopi den publisidat kompará ku tópikonan manera asfaltá kaya òf oumento di ònderstant pero e ta un ministerio sumamente importante pasobra ta Ministerio di BPD ta atendé ku posishon hurídiko di ámtenarnan pues, e ta e kurason di gobernashon.”

E miembro di direktiva di ABVO ta splika mas aleu ku tabata un sorpresa desagradabel pa ABVO pa a tuma nota kuantu fayo a e ministerio a kometé na desèmber 2024 ora a dal e siguiente paso pa paga ‘loontrede’ i ‘lumpsum’ ku forsa retroaktivo te ku aña 2020. A kometé kantidat grandi di fayo entre otro den korekshon di salario di ámtenarnan i esnan ku a baha ku vvu (‘vervroegde vrijwillige uittreding’). Apesar ku a primintí di lo koregí e fayonan akí, t’asina ku te ainda miembronan ta aserká ABVO ku reklamo ku no a drecha nan salario.

“Pa esnan ku a baha ku vvu a situashon ta hopi fèrfelu pasobra mester drecha nan salario pa asina fondo di penshun por drecha nan penshun.” Margaritha ta kuestioná den esaki dikon bou di minister Hato a kore ku e tim ku tabatin na Ministerio di BPD ku na aña 2023 si a hasi un hopi trabou. “Ta parse ku bou di e minister nobo no a wak kontenido si no a wak sensashonalismo djis pa skor polítikamente i kore ku hende ku tabatin kapasidat i e fórmula korekto pa hasi e kalkulashonnan.”

Mas aleu Margaritha ta bisa ku loke gobièrnu tinku paga e ámtenarnan no ta un regalo sinno algu ku ámtenarnan tin derechi riba dje i a lucha p’é den korte i gana e kaso. “Gobièrnu di ‘aquel entonse’ a rekonosé esaki i bisa ku na momento ku tin espasio finansiero ta paga. E pago di e indeksashon ku a tuma lugá na aña 2023 a kana profeshonal pero na aña 2024 a traha un tutu di e pagonan di ‘loontrede’ i ‘lumpsum’ loke ABVO ta lamentá enormemente.”

Reunion

Segun Margaritha ta for di ougùstùs di aña 2024 ku minister Hato a tuma enkargo di Ministerio di BPD no a informá sindikatonan mas i no tabatin kontakto formal entre e minister di BPD i sindikatonan. Esaki kontrali na e situashon ku tabatin bou di e minister anterior. “Aworakí ta riba media sosial manera Facebook sindikato i ámtenar mester lesa ki dia ta paga i kuantu ta paga miéntras ku e minister di BPD tambe ta partisipá na e práktika akí.”

E ta sigui bisa: “Internamente no tin niun hende ku sa kiko ta bai pasa i ta awe ABVO no ta haña informashon tampoko.”

Deloitte

Tin un trayekto mas ku e sindikato ta reklamá ku no ta tende nada mas di dje. “A kuminsá un trayekto huntu ku ofisina di Deloitte pa inventarisá tur loke tin pegá manera opheshonnan ku ámtenarnan a entregá kontra kualke desishon den pasado. E trayekto akí mester a sòru pa un limpiesa total kaminda ta atendé ku tur asuntu pendiente di ámtenarnan i esnan ku a baha ku vvu. Entretantu t’asina ku sindikatonan no ta haña informashon di e trayekto akí tampoko i no sa kiko ta pasando.”

Hustisia

Tin mas asuntu ku ABVO ta bisa ku no ta haña minister Hato pa papia kuné.” Por ehèmpel den su kalidat komo titular di Hustisia tin un problema ku stashonamentu di outo ku trahadónan di UOJZ (‘Uitvoeringsorganisatie Justitiële Zorg’) ta sintá kuné. “A pidi un minister un reunion pa atendé ku e situashon akí pero te awe no a tende nada di e minister.”

Plan

ABVO ke sa di Hato ta ki plan e tin pa hasi e korekshonnan pasobra ta tur dia tin miembro ta yama i puntra kon a para pero no por duna nan kontesta pasobra e sindikato no ta risibí informashon. “ABVO no ta bai keda ketu mas, pasobra ta keda manera ta nos no ta hasi nos trabou.”

Margaritha ta sigurá ku ABVO ta traha na interes di su miembronan i ta kooperá pa e diferente trayektonan por kana i ta spera ku gobièrnu tambe ta serio den respetá derecho di e ámtenarnan. “Si no e minister tin ku sali bisa ku e tin un problema ku sindikatonan. Den e kaso akí e mester yama presidentenan pa papia ku nan.”

Pa Margaritha e manera ku ta trata ámtenarnan no ta nèchi. “Nan tambe ta vota, nan tambe ta paga impuesto i nan tambe tin yu ku ta bai skol. Pero si ta asin’akí ta atendé ku empleadonan públiko skibiendo riba Facebook sin ku ta haña oportunidat pa hasi pregunta, e no ta bon.”

 

Foto:

...Raymond Margaritha…

 

 

LAGA UN KOMENTARIO

Please enter your comment!
Please enter your name here