LIMA (AFP).- E presidente di Perú, Dina Boluarte, ayera a komparesé dilanti di fiskalnan anti korupshon ku ta investig’é pa a desaktivá e unidat polisial ku a listra den su kas den e kaso di Rolexgate, den un kaso nobo di aparente abusu di outoridat.
E interogashon a dura kasi tres ora largu na Lima, despues di kua Boluarte a retirá ku su kustodia polisial sin ku el a hasi deklarashon na prensa.
Palu dje edifisio di Ministerio Públiko, desena di manifestante kontra di gobièrnu tabatin bòrchinan bisando “manda e ladron prizòn”, refiriendo na e mandatario.
Ministerio Públiko ta investigá Boluarte pa abuso di outoridat i inkubrimentu personal.
Den e investigashon a hinka tambe e eks-minister di interior Walter Ortiz, akusá di a kometé e delito kontra di atministrashon di hustisia na momento ku dia 9 di mei el a ordená kanselashon dje ekipo polisial spesial ku ta apoyá Ministerio Públiko den investigashonnan kontra korupshon di parti di funshonarionan haltu di gobièrnu.
Gobièrnu peruano a hustifiká e akshon bisando ku tin un otro divishon polisial ku por kumpli ku e investigashon enkuestion.
E presidente peruano ademas ta den bista di ministerio públiko pa otro dos kaso. E denunsia mas resien a keda entregá djaluna na parlamento di parti dje fiskal general Juan Carlos Villena, kende ta akusá e presidente di soborno den kuadro di un skandal ku oloshinan di luho konosí komo “Rolexgate”.
Tambe ministerio públiko ta akus’é di homisidio, komo responsabel dje represhon di protestanan ku a laga 50 morto despues ku el a yega na poder den desèmber di 2022.
Di akuerdo ku Konstitushon dje pais, e mandatario por keda hibá Korte solamente despues di fin di su mandato den yüli di 2026.
Perú den apénas ocho aña a konosé seis mandatario, meimei dje ola di instabilidat mas pió dje pais.
