BRASILIA.- Ministerio Públiko brasilero ayera a pone un banda e argumentonan di e defensa di eks-presidente Jair Bolsonaro, pa evitá di por keda husgá pa gòlpi di estado. E desishon awor ta kai den mannan di Korte Supremo.
Medio febrüari Ministerio Públiko a akusá e eks-mandatario ultraderechista (2019-2022) di a traha un kòmplòt, ku finalmente a frustra, pa stroba e instalashon di Luiz Inácio Lula da Silva, kontra ken el a pèrdè elekshon den 2022.
Bolsonaro huntu ku 33 persona a keda akusá di “gòlpi di estado”, “di a purba di forma violento pa mishi ku estado demokrátiko di derechi” i “organisshon kriminal armá”, entre otro delitonan.
Siman pasá e defensa a presentá nan argumentonan, riba e último dia dje posibel periodo fihá pa e hues di Tribunal Supremo Federal enkargá ku e kaso, Alexandre de Moraes.
Ministerio Públiko ayera a rechasá e argumentonan ei, entre nan, supuesto inkompetensia di Korte Supremo pa husga e eks-mandatario i e falta di akseso kompleto na elementonan ku a keda rekompilá durante dje investigashon.
E hues Moraes mester evaluá e reakshon di Ministerio Públiko i disidí si ta start un kaso kontra dje eks-presidente. Ounke no a fiha fecha, e desishonnan ei por tuma den kareda di un luna.
