Pastor Morrison a duna futuro Presidente di Korte, mr. Carmelia bendishon spesial
WILLEMSTAD. – Djadumingu, 22 di febrüari, misa di Wishi a kumpli 95 aña. Komo ta kuaresma i tin hopi mantenshon ku tin ku finalisá ainda na misa di Wishi, Pastor Julio Gonzales Briceño, a opta pa hasi un Santu Sakrifisio di misa i despues parti algu pa kome i bebe pa e fielnan ku a akudí na e misa. Den e personanan ku a bini misa tabata tin Gobernador, Su ekselensia mr. Mauritz de Kort, huntu ku e futuro Presidente di Korte, Sr. mr. Sigmar Carmelia.
Pastor Morrison La Porte, huntu ku Pastor Julio i Pastor Ronald Kiban a hasi e Santu Sakrifisio di misa.
‘10 aña pasá ora misa a kumpli 85 aña mi a Skibi un relato di kon e misa a keda fundá i tur e personanan ku tabata enbolbí ku e misa.’
10 aña pasá, no tabatin un pastor permanente na misa di Wishi. Na 1985 tur hende tabata kòrda defuntu Pastor Danillo Morales ku a fayesé i despues di esei, a tarda basta tempu pa misa di Wishi haña un pastor permanente. E misa su mantenshon ta eksihí hopi i Pastor Julio ku tin 4 aña enkargá ku e misa ta hasi tur su posibel pa finalisá tur e mantenshon ku tin mester pa duna e misa aki un aspekto nobo i pone den un estado ku e por funshoná di un manera óptimo.
Pastor Morrison den su predikashi a pidi tur hende pa resa pa Pastor Julio pa asina e por kumpli ku tur e metanan ku e tin su dilanti pa hasi misa di Wishi un misa “up en top”. No ta algu fásil pero ku perseveransia i fe, esaki sigur lo logra.
Gobernador di Kòrsou a keda hopi enkantá pa tabata testigu di e selebrashon di 95 aña di misa di Wishi. Manera ya indiká, futuro Presidente di Korte, sr. mr. Sigmar Carmelia tambe a kompañá Gobernador i Pastor Morrison a duna mr. Carmelia un bendishon spesial pa asina dun’e forsa den e labornan ku e lo tin ku bai kumpli kuné, una bes su nombramentu ta ofisial.
Sr. Kenneth Valpoort kende tambe ta den e komishon di fiesta a gradisí un i tur ku a duna nan kooperashon pa tur e trabounan ku tin ku wòrdu hasi un petishon riba generosidat di pueblo pa sigui kooperá pa asina e trabounan ku tin ku kaba por wòrdu finalisá. Spesial sèn pa paga e machinan i trahadónan pa fèrf e misa. Fèrf tin kaba. E number di kuenta ku por hasi un donashon ta nòmber di “Proyekto Parokial Misa di Wishi” Number di kuenta: MCB 24835806.
E Santu Sakrifisio di misa tabata unu hopi bunita i tur presente por a disfrutá di un kos di kome i bebe na final di e servisio.
Pastor Julio a gradisí presentenan pa nan presensia i a primintí ku apesar ku e retonan ta hopi grandi e ta sigui ku e trabou ku el a kuminsá pa hiba esaki na un final felis. No ta tur biaha ta mes fásil pero ku poder di Dios i komunidat di Wishi e lo logra.
Mi no ke terminá e relato aki sin bisa aserka ku misa di Wishi tin dos patrono ku ta Santa Teresita i na 1981, e pastor di e tempu ei Gariel Lopez a pidi Mgr. Ellis pèrmit pa Hesus Miserikòrdia tambe ta patrono di misa di Wishi. Defuntu Mgr. Ellis a honra e petishon ku ta pone ku Misa di tin dos patrono. E potrètnan ta papia pa nan mes.
