LA PAZ, AP.- E mishon di Nashon Uní na Bolivia a hasi un petishon pa e gobièrnu i oposishon dialogá pa rekuperá pas despues di e terser morto entre manifestantenan despues di e elekshon presidensial den e pais.
“Nashon Uní a ekspresá su konsternashon profundo i indignashon kontra e nivel haltu di violensia kual a kousa un morto mas. E entidat ta eksihí pa Polis Nashonal, Ministerio Públiko i e Órgano Hudisial pa investigá, prosesá i sanshoná e personanan responsabel pa esaki”, segun manifestashon di Sentro di Informashon di Nashon Uní na Bolivia den un komunikado. Iglesia Katóliko tambe a hasi un petishon similar, atraves di e arsobispu di Santa Cruz, Sergio Gualberti, segun indikashon di e partinan.
E krísis na Bolivia a kobra bida di un terser víktima. Un studiante opositor a muri na Cochabamba, den sentro di e pais, kaminda a registrá konfrontashonnan violento riba kaya entre opositornan i ofisialistanan ku a laga por lo ménos 90 persona heridá.
Dos opositor a muri siman pasá na Santa Cruz den konfrontashonnan similar. E protestanan na fabor i kontra di Morales a intensifiká despues di elekshon di 20 òktober, kaminda e mandatario a gana, ku akusashonnan indikando ku el a kometé froude pa mantené su puesto.
