Un mucha palestino ta zuai ku bandera di Palestina kanando riba ruinanan ku a keda despues di e hopi bombardeonan israelí riba Gaza.
GRAN BRETANIA (AFP).- Ayera e mishon Palestino na Londres a organisá un seremonia di hisa bandera, un dia despues di rekonosimentu di Estado Palestina di parti di Reino Uní. E hefe di delegashon, Husam Zomlot, a selebrá e rekonosimentu “sperá pa hopi tempu” ora ku e bandera a keda hisá den presensia di un grupo di personanan dilanti dje edifisio na Hammersmith, den wèst di Londres, kaminda ya tabatin un bandera palestino.
Zomlot a mustra un plakat ku e inskripshon “Embahada di Estado di Palestina” i a bisa ku pronto lo e keda kologá, “ora ku kaba di atendé algun formalidat hurídiko i atministrativo”.
Zomlot a bisa ku “e rekonosimentu ta e reparashon di un inhustisia históriko” na un momento ku e pueblo palestino ta enfrentá un “sufrimentu inimaginabel” a kousa di e guera den Gaza. Mas aleu el a trese dilanti ku e rekonosimentu di parti di Reino tin un resonansia partikular pasobra e pais akí tabata klave pa pone e basenan pa kreashon di Estado di Israel den 1948.
“Outoridat Palestino por establesé un embahada i nombra un embahador den Reino Uní”, segun Yvette Cooper, sekretario di Estado britániko pa Relashonnan Eksterior. El a agregá ku “nos lo definí e etapanan diplomátiko ku e outoridat palestino”.
Despues di e anunsio di parti dje promé minister laborista, Keir Starmer, kansiyeria britániko a aktualisá su página di konseho na biaheronanan pa remplasá e referensia na “teritorionan palestino okupá” pa “Palestina”. Vários otro pais ayera a keda di hasi e meskos.
E promé minister israelí, Benjamin Netanyahu, a akusá e dirigentenan ku ta realisá e rekonosimentu ei di ta duna “un rekompensa na terorismo” despues dje atake di 7 di òktober 2023 ku a mata 1.219 persona den Israel loke ku tabata inisio dje guera den Gaza. Mientrastantu, e ofensiva di Israel a mata mas ku 54.350 palestino den Gaza, tambe e gran mayoria di di víktima ta sivilnan.
