LA PAZ, BOLIVIA (AFP).- E presidente di Bolivia, Luis Arce, ayera a denunsiá un intento di gòlpi di estado i a huramentá un hefe militar nobo, loke a provoká mobilisashon dje forsanan na mando dje hefe destituí ku a purba kibra drenta den e palasio presidensial.
E general Juan José Zuñiga, komandante di ehérsito, a keda restituí i por a mir’é ta drenta e palasio i despues di algun minüt a sali kanando.
Poko despues Arce a konvoká bolivianonan pa mobilisá “kontra di gòlpi di estado”, i a huramentá komandantenan nobo den e mesun palasio presidensial, segun un transmishon bibu na televishon.
E tropanan na mando dje hefe di ehérsito destituí a retirá nan mes for dje plasa despues di vários ora di mobilisashon.
Arce a mustra viktorioso. “Ningun hende por kita e demokrasia ku nos a gana. “Nos lo sigui traha”, segun el a bisa for di e balkon di palasio di gobièrnu dilanti di algun shen siguidó.
Zuñiga, general ku ta buska na impedí e regreso di eks-presidente Evo Morales na poder den 2025, a sigurá ku e militarnan ke “restrukturá demokrasia” na Bolivia i a eksigí e liberashon di opositornan prezu.
“Forsanan armá ta insistí pa restrukturá demokrasia, pa e ta un demokrasia di bèrdat. “No demokrasia pa algun hende, no pa e doñonan ku ya tin 30, 40 aña manehando e pais”, el a bisa pafó dje sede presidensial, rondoná pa sòldánan i ocho tanki militar.
Evo Morales, rival di Arce den e partido di gobièrnu Movimiento Al Socialismo (MAS) ku ta buska regreso na poder otro aña, a denunsiá un “gòlpi di estado”.
“Nos ta konvoká un mobilisashon nashonal pa defendé demokrasia kontra e gòlpi di estado ku ta biba den kabes di general Zuñiga”, segun el a bisa.
For di djamars ta sirkulá rumornan riba probabel destitushon dje hefe di ehérsito, den funshon for di novèmber di 2022, i kende ta oponé pa Morales kende ta eks-aliado di Arce, por regresá na poder.
Den un entrevista djaluna na un kanal di televishon, Zuñiga a sigurá ku lo e para Morales si esaki insistí pa postulá su mes pa presidensia den 2025, apesar ku el a keda inhabilitá pa hustisia elektoral.
Luis Arce, meskos ku Morales miembro dje partido MAS, no a pronunsiá si lo e buska reelekshon.
A detené general Zuñiga
Den oranan di ayera nochi e komandante destituí di ehérsito boliviano, Juan José Zúñiga, a keda detené komo esun ku a komandá un intento di gòlpi di estado kontra dje presidente Luis Arce.
Zúñiga a keda arestá i kondusí pa un vehíkulo polisial pafó di un kazèrne militar. “A detené mi general!”, segun e vise ministro di interior di gobièrnu, Jhonny Aguilera, segun imágen di televishon estatal.
