Marck Hoijer
Nos hóbennan ta sigui bria. E programa di djasabra a tuma un momentu pa papia ku e hóben, Marck Hoijer, un miembro di Hóben Goberná. Resientemente, Marck huntu ku un otro hóben, Deshaune Gosepa, a representá Kòrsou na Model United Nations na Trinidad i Tobago. Tabata un eksperensia inolvidabel pa e hóbennan, i ta bon pa kompartí ku e pueblo di Kòrsou, spesialmente otro hóbennan, pa nan sa di e oportunidatnan aki. Marck a konta kon e biahe a bai i kiko tur nan a logra den e plataforma internashonal di Nashonnan Uní.
Model United Nations
Model United Nations ta un simulashon kaminda bo ta siña kon e prosesonan di Nashonnan Uní ta funshoná, manera den General Assembly na New York. Bo ta siña debatí, trese bo puntonan dilanti, redaktá klóusulanan i komprondé desishonnan internashonal ku ta keda tumá. Ademas, bo ta representá un pais i su punto di bista riba e tópikonan ku ta keda tratá durante e programa.
Representantenan di Kòrsou na Model United Nations
Marck ta konta ku e oportunidat aki tabata posibel dor di un kolaborashon entre Rotary Club na Kòrsou i Rotary Club di Willemstad. E organisashon a anunsiá riba medionan sosial ku nan ta den búskeda di hóbennan ku ta interesá pa sigui e kurso di Model United Nations, ku e oportunidat di keda skohé pa representá Kòrsou na Trinidad i Tobago. E mes, a keda informá di e programa aki pa medio di un persona den direktiva di Hóben Goberná ku a bisa: “Nos a risibí un invitashon di Rotary Club. Tin algu di bosnan ku ta interesá pa forma parti di e entrenamentu pa bai Model United Nations?” Asina Marck a drenta den kontakto ku Rotary Club. Dies hóben a inskribí, i despues di 6 siman di training intensivo riba debatí, presentá puntonan i hasi investigashon, nan a selektá dos hóben, di kual ta Marck i Deshaune.
E ta sigui konta ku e motibu ku el a apliká ta dor di a keda inspirá pa su ruman muhé, Kirina Hoijer, un persona asertivo, ku ta tuma inisiativa. For di chikí, Marck tabatin gana di ta un persona ku tin konfiansa, i no tin miedu pa identifiká inhustisia i trese su punto di bista dilanti. Marck ta invitá tur hóben di Kòrsou ku ta interesá di usa nan bos pa trese kambio, pa tuma kontakto i pa inskribí pa drenta den Hóben Goberná. “Purba di forma parti di organisashonnan manera esakinan. Buska kualke oportunidat ku ta kontribuí na bo desaroyo. “Abo komo individual ta e futuro di bo pais. Si bo ke mira bo pais progresá invertí den bo mes i bo lo mira resultado pa e siguiente generashon.”
Trinidad i Tobago
E hóbennan a biaha pa Trinidad i Tobago pa 5 dia. E programashon di Model United Nations a tuma lugá riba e 2 dia, pero e hóbennan a keda un tiki mas largu pa forma parti di otro proyektonan interesante. Marck ta konta ku nan a bishitá un NGO lokal i tambe Embahada di Ulanda na Trinidad I Tobago. Nan a kompartí informashon, risibí orientashon i haña un bista mas kla riba loke ta sosodé den mundu i ki kareranan nan lo ta deseá di hasi den futuro..
“Ta hopi importante,” Marck ta bisa, “pa forma parti di proyektonan asina aki.” E ta sigui konta ku nan a bishitá United Nations Volunteer Programme (UNV), ku ta di Trinidad, Aruba, Kòrsou i Sint Maarten, algu ku hopi hende no ta konsiente di dje. Riba e dia aki nan a kombersá ku sr. Ugo Blanco, representante di United Nations pa e paisnan aki den Karibe. E hóbennan a risibí e oportunidat pa splika e importansia di introdusí hóbennan na e tipo di programanan aki. Segun Marck, esaki ta yuda hóbennan bira mas konsiente di tópikonan ku tin influensia direkto i indirekto riba nan bida i riba nan futuro. E ta enfatisá tambe ku ta fundamental pa hóbennan haña formashon den aspekto di nos ekonomia i relashonnan internashonal, pa nan por analisá krítiko loke ta sosodé i tuma inisiativa pa nan krea un bos den desishonnan ku ta afektá nos komunidat.
Marck a menshoná hopi kos bunita, pero den práktika na Kòrsou
Segun Marck, tin hopi proyekto ku hóbennan ke krea, pero e reto grandi ta ku hopi di esaki ta keda para promé ku nan kuminsá. Esaki ta pasa regularmente paso no tin sufisiente fe den e proposishonnan ku ta bin dilanti dor di nos di hóbennan, òf tin e ideologia ku nos hóbennan no ta serio òf no tin e kapasidat. “Ami tei awe i ta partisipá den e programa di djasabra pa demonstrá e hendenan ku tin poder pa yuda nos krea e inisiativanan aki ku nos hóbennan ta kapasitá. I ku nos ta tumando desishonnan riba nos mes pa nos futuro,” Marck ta enfatisá.
Atraé otro hóben pa yuda bo konkretisá e ideanan aki
E ta bisa ku tur kos ta kuminsá den su rutina di tur dia. “Mi ta lanta mainta i mi ta bisa mi mes: go get them,” e ta konta ku un sonrisa. Tur dia e ta intentá di ta un bon ehèmpel den su sírkulonan i motivá esunnan ku ta rondó di dje pa nan sigui nan meta. Kada bia ku bo topa ku un opstákulo i bo ta pensa: “esaki ta difísil, esaki ta imposibel,” e ta bisa ku si bo tin Dios na promé lugá, tur kos ta posibel. I di dos, si bo mira e opstákulo i bo haña ku e ta duru pa superá, semper kòrda riba bo meta, pa kiko bo ta hasi e i sigui su tras, paso den tur opstákulo bo ta haña kresementu i bo ta sigui desaroyá.
Un vokabulario grandi
Marck ta splika ku e ta hopi selektivo ku loke e ta konsumí riba medionan sosial. Ora e ta riba Instagram òf otro medionan sosial, e ta analisá bon si e video ta edukativo òf simplemente ta mal gastando su tempu. E ta kere ku tur segundo ku bo ta skròl bo por usa pa gana sèn, siña algu nobo òf desaroyá bo mes. “Ta un desishon kon bo ta usa bo tempu,” e ta bisa. Kada dia e ta tuma stapnan konkreto pa krese personalmente, i e ta puntra su mes kon e por usa esaki pa sali pafó i sirbi pa benefisiá su komunidat.
Tin sufisiente atenshon riba nos hóbennan
“Mi no ke kritiká miembronan di gobièrnu òf otro personanan ku ta tuma desishonnan importante pa nos pais. Mi sa ku hopi di nan ta hasi esfuerso i nos tin di atmirá esaki. Pero mi ta haña ku den sierto prosesonan e ta limitá. Tur desishon ku bo tuma ku tin influensia riba nos komunidat mester ta basá riba informashonnan konkreto, abase di statistiknan i análisis profundo, promé ku aseptá e desishon, ku lo por tin un efekto grandi. Un desishon por parse bon den korto tempu, pero despues di dies aña e por mustra un efekto negativo i por subi na un eskala mundial. Esaki ta mustra ku Kòrsou mester kuminsá spesialisá den e terenonan mundial, i tene na kuenta di kua prospekto nan ta wak nos internashonal.
Marck Hoijer aki sinku aña
Na e momentu aki Marck ta studia na Nilda Pinto SBO, i ta enfoká riba ekonomia i entrepreneurship, di kual e ta bisa ku e ta hopi pashoná riba dje. P’esei, e ta manera e ta paso e gusta loke e ta hasi. E ta mira su vishon i ta komprondé unda e ke yega. E ta kere ku edukashon ta fundamental pa yuda e hendenan rondó di bo, i e ke tin e edukashon ei promé, pa por ta un bon lider den futuro ku lo trese Kòrsou dilanti.
E ta rekonosé esaki bèk ora ku el a bai Trinidad, kaminda el a realisá ku Kòrsou ta un isla ku ta isolá i ku ta limitá ku konekshon direkto ku otro islanan, kompará ku e konekshon ku Ulanda. E ta pensa ku nos por trese nos kompania- i servisionan na otro pais. Segun e, komunikashon ta esensial, paso tin hopi potensial riba Kòrsou ku nos por realisá. “Ami lo ke ta un persona ku por yuda Kòrsou krese,” e ta bisa.
Gobernashon i polítika tin hopi influensia riba desishonnan ku ta tuma lugá, pero individual, bo por traha serka ku un organisashon, fundashon òf grupo demográfiko pa krea e efekto. ”Den demokrasia e hende tin poder, unabes un demografia ta konsiente di su poder, nan por produsí kambionan drástiko den e komunidat.”
Motivashon i inspirashon
“Motivashon i inspirashon ta fundamental.” Motivashon ta importante paso ora un hóben ta motivá, e sa unda e ta bai. Pero loke ta mas importante ku motivashon ta disiplina. Ora bo tin motivashon i disiplina, bo ta por disidí bo direkshon i unda bo ke yega. Inspirashon ta e parti kaminda nos ta purba trese konosementu pa motivá hóbennan ku tin yen oportunidat, pa nan sigui nan soño i logra nan meta, i pa nan por komprondé e poder ku nan tin. Nos edukashon tin hopi posibilidat. Tin hopi kos ku Marck ke mira kambio aden, pero e enfatisá ku nos mester apresiá loke nos tin. Nos nivel di edukashon ta bastante bon si nos kompará e ku otro paisnan den region. Si nos invertí den nos sistema manera ku nos ta splika, nos lo por mira un kambio grandi. E manera ku nos trese informashon i splika konsepto tin un efekto hopi grandi. “Palabra tin poder,” e ta bisa. Awor aki tin un proyekto ku International School ta hasi, ku ta un oportunidat pa hóbennan siña i praktiká Model United Nations, ku lo klousurá den simulashon na Centrale Bank.
Marck ta será e programa ku un último palabra pa mayornan, pa nan stimulá nan yu, guianan i koregí nan den e kaminda korekto. I pa e hóben e ta bisa “Purba di hasi un kambio. Purba na desaroyá bo mes na un nivel kaminda bo por bisa ku konfiansa ku bo sa bo kosnan i ku bo por realisá nan ku tur e rekisitonan, i problemanan. Paso ora bo ta mihó den loke bo ta hasi, nada no por para bo.”
