NEW YORK, USA (AFP).- Despues di kasi tres luna di huisio, ministerio públiko di New York ayera a konkluí ku e poderoso senador demokrat Robert “Bob” Menendez a pone su “poder na benta” partisipando den un kaso klásiko di korupshon na gran eskala.
Esun persona ei ku tabata presidente dje Komishon di Relashonnan Eksterior di Senado, funshon ku el a bandoná ora ku el a keda akusá, i un dje pesonan pisá di Partido Demokrat, ta akusá di 18 kaso di soborno, froude, ekstorshon, opstrukshon di hustisia i di a risibí pagonan pa aktua komo agente estranhero di gobièrnunan di Egipto i Qatar.
Segun e fiskalnan, Menendez (70 aña) i su kasá, Nadine Arslanian, a risibí komo regalo desena di míles di dollar, prendanan di oro i un outo luho di marka Mercedes.
Si e hurado deklar’é kulpabel, e polítiko di estado di New Jersey i orígen kubano, por pasa 20 aña den prizòn.
Den su palabranan final, ku a tuma lugá hinter djaluna atardi i a kaba djamars, e fiskal Paul Monteleoni a rekordá e hurado ku den 2022 durante di un entrada polisial den kas di Menendez, na New Jersey, a topa ku “ènvelòp tras di ènvelòp ku sèn” skondé entre paña, den kashi i den un kaha fuerte. En total, 480.000 dollar.
Ademas di eseinan, tambe a haña 70.000 dollar den un ‘safety box’ ku ta pertenesé na su kasá, tambe 13 bara di oro, kuater di nan di 1 kilo kada un. Segun ministerio públiko, el a haña esakinan serka tres empresario ku tabata metí den un “skema di korupshon” i ku tabatin komo meta pa enrikesé nan mes protehá pa Menendez.
Dos di e empresarionan aki, Fred Daibes i Wael Hana, mester komparesé huntu ku e senador komo akusadonan, miéntras ku un di tres, José Uribe (ku a regalá e Mercedes na kasá di Menendez) a aseptá pa kolaborá ku hustisia despues di a deklará su mes kulpabel.
E kaso kontra di Nadina Arslanian a keda posponé p’e luna’ki pa motibu ku e mester a haña tratamentu pa kanser.
Segun ministerio públiko, Menendez a saka for di pais “informashon sensibel” di gobièrnu norteamerikano i “a tuma medidanan ku den sekreto a yuda gobièrnu di Egipto”, esaki sigur riba tereno militar i di inteligensia.
