Eks-prens Andrew kende ta tresiendo hopi problema pa monarka britániko.
SANDRINGHAM, Gran Bretania (AFP).- Polis ayera a registrá pa di dos dia siguí e kas kaminda ku eks prens Andrew tabata biba. Djaweps nan a arestá Andrew durante di diesun ora pa su relashon ku e kaso Epstein, un insidente ku a laga fundeshi dje monarka britániko tambaliá. Ounke ku e ruman menor di Rei Charles por a regresá su kas na Sandringham, den ost di Inglatera, e kadena Sky News ayera a publiká imágennan di polis den Royal Lodge, su kas bieu den Windsor, ku ya a keda listrá un dia promé.
Despues di su aresto, Andrew, ku a keda ekskluí di monarkia pa motibu dje skandal aki, a keda poné den libertat bou di investigashon. E eks prens a keda arestá debí na sospecho riba komportashon inkorekto den ehersisio di un trabou públiko tempu ku e tabata representante spesial di Reino Uní pa komersio internashonal, entre 2001 i 2011. Algun dje miónes di dokumentonan publiká pa Departamento di Hustisia di Merka dje investigashon di Jeffrey Epstein parse di ta indiká ku Andrew ku e tempu ei tabata prens, lo a pasa informashonnan konfidensial na e finansiero i delinkuente seksual, kende a muri den 2019. Segun un e-mail dirigí na Epstein, fechá 24 di desèmber di 2010, e ruman di rei Charles III a duna “un informe konfidensial” riba oportunidatnan di invershon na Afganistan. E e-mail ta huntu ku otro dokumentonan ku ta indiká ku den 2010 Andrew a manda pa Epstein informashonnan riba biahenan di trabou realisá pa China, Singapur i Vietnam.
Polis di Londres a indiká ku nan ta buskando kontakto ku agentenan di protekshon aktual i esnan di pasado dje eks-prens. “A pidi nan pa reflekshoná riba loke na a mira òf tende i ku por yuda nos investigashonnan”, segun Polis Metropolitano den un komunikado.
